ஈஸ்டர் ஞாயிறு தாக்குதலின் 5வது ஆண்டு நினைவேந்தல் நிகழ்வின் போது கார்தினால் மெல்கம் ரஞ்சித் அவர்களினால் தம்மீது சுமத்தப்பட்ட குற்றச்சாட்டுகள் தொடர்பில் முன்னாள் ஜனாதிபதி கோட்டாபய ராஜபக்ஷ விசேட அறிவிப்பொன்றை வெளியிட்டுள்ளார்.
கார்தினால் மெல்கம் ரஞ்சித் அவர்கள் முன்வைத்த 4 பிரதான குற்றச்சாட்டுகளை மேற்கோள்காட்டி இது தொடர்பான அறிவிப்பு வெளியிடப்பட்டுள்ளது.
-மேற்கோள் –
• ஈஸ்டர் ஞாயிறு தாக்குதல் தொடர்பான ஜனாதிபதி விசாரணை ஆணைக்குழுவின் அறிக்கை எனக்குக் கிடைத்த மறுநாள், நான் கார்தினால் அவர்களை தொலைபேசியில் அழைத்து, அந்த அறிக்கையில் குறிப்பிடப்பட்டுள்ள பரிந்துரைகளை அமுல்படுத்தச் சென்றால், என்னை ஆதரித்தவர்களை கைது செய்து அவர்களின் அமைப்புகளை தடை செய்ய வேண்டும், எனவே அந்த பரிந்துரைகளை செயல்படுத்துவது கடினம் என்றும்,
• ஜனாதிபதி ஆணைக்குழு அறிக்கையின் முதல் தொகுதியின் நகலை நான் கார்தினால் அவர்களுக்கு வழங்குவதில் தாமதம் செய்தேன் என்றும் மீதமுள்ள தொகுதிகளை அவருக்கு வழங்கவில்லை என்றும்,
•ஈஸ்டர் ஞாயிறு தாக்குதல் குறித்து விசாரணை நடத்த நியமிக்கப்பட்ட பல்வேறு குழுக்கள் மற்றும் ஆணைக்குழுக்கள் வழங்கிய பரிந்துரைகளில் சிலவற்றை மட்டும் தேர்ந்தெடுத்து நடைமுறைப்படுத்த ஆறு அமைச்சர்கள் கொண்ட அமைச்சரவை உபகுழுவை நியமித்தேன் என்றும்,
•ஈஸ்டர் ஞாயிறு தாக்குதலை விசாரிக்கும் சிஐடி அதிகாரிகளை இடமாற்றம் செய்து விசாரணையை நாசப்படுத்த ஒரு மூத்த சிஐடி அதிகாரியை சிறையில் அடைக்க நான் ஏற்பாடு செய்தேன் என்றும் தெரிவிக்கப்பட்டிருந்தது.
முதலாவது குற்றச்சாட்டு தொடர்பில்,
ஈஸ்டர் ஞாயிறு தாக்குதல் தொடர்பான ஜனாதிபதி ஆணைக்குழுவின் அறிக்கை கிடைத்தவுடன், நான் கார்தினால் அவர்களை அழைத்து, ஜனாதிபதி ஆணைக்குழுவின் பரிந்துரைகளை அமுல்படுத்துவது கடினம், ஏனெனில் நான் எனக்கு நெருங்கியவர்களைக் கைது செய்ய வேண்டும் என்றோ, அவர்களின் அமைப்புகளை தடை செய்ய வேண்டும் என்றோ கூறுவதற்கு, முஸ்லிம் சமூகம் எனக்கு வாக்களிக்கவில்லை என்பதும், ஜனாதிபதி தேர்தலில் எனது வேட்புமனுவை ஆதரிக்கவில்லை என்பதும் தெரிந்த விடயம்.
எனவே, ஈஸ்டர் ஞாயிறு தாக்குதலுடன் தொடர்புடைய காரணத்தால் தடை செய்யப்பட வேண்டிய எந்த அமைப்பிலும் எனக்கு நெருக்கமானவர்கள் இருக்க முடியாது.
கார்தினாலின் இரண்டாவது குற்றச்சாட்டு,
ஈஸ்டர் ஞாயிறு தாக்குதல் தொடர்பான ஜனாதிபதி ஆணைக்குழுவின் அறிக்கை 2021 பெப்ரவரி 01ம் திகதி என்னிடம் கையளிக்கப்பட்டது. நான் அதை ஆய்வு செய்து, அட்டர்னி ஜெனரலுக்கு அனுப்பி, 2021 பிப்ரவரி 23 அன்று, நாடாளுமன்ற சபாநாயகரிடம் அறிக்கை சமர்ப்பிக்கப்பட்டது.
மார்ச் 01, 2021 க்குள், மகாநாயக்கர், கர்தினால் மற்றும் கத்தோலிக்க ஆயர்களுக்கு பிரதிகளை வழங்க நாங்கள் ஏற்பாடு செய்தோம். எனவே, இது தொடர்பான அறிக்கையை கார்தினாலிடம் ஒப்படைப்பதில் தாமதம் ஏற்பட்டதாகக் கூறப்படுவதை நான் ஏற்கவில்லை.
ஈஸ்டர் ஞாயிறு தாக்குதல் தொடர்பான ஜனாதிபதி விசாரணை ஆணைக்குழுவின் அறிக்கை எனக்கு கிடைத்த பின்னர், அந்த அறிக்கையில் குறிப்பிடப்பட்டுள்ள பரிந்துரைகள் மற்றும் முன்னர் வெளியிடப்பட்ட பாராளுமன்ற தெரிவுக்குழுவின் அறிக்கையை நடைமுறைப்படுத்துவதற்கு முன்னுரிமை அளிப்பதற்காக ஆறு பேர் கொண்ட அமைச்சரவை உபகுழுவை நியமித்தேன்.
மேலும் அந்த பணிகளை சம்பந்தப்பட்ட அரசு துறைகள் மற்றும் நிறுவனங்களுக்கு விநியோகிக்க வேண்டும். பொது நிர்வாக நடைமுறைகளின்படி, அமைச்சரவையின் அறிவுறுத்தல்கள் இல்லாமல் அரசு துறைகள் மற்றும் நிறுவனங்களால் தொடர்புடைய பரிந்துரைகளை செயல்படுத்த முடியாது.
2019 நவம்பர் மாதம், பொலிஸ் மா அதிபரின் பரிந்துரையின் பேரில், அப்போதைய குற்றப் புலனாய்வுத் திணைக்களத்தின் பணிப்பாளர் பொலிஸ் ஆணைக்குழுவினால் இடமாற்றம் செய்யப்பட்டார்.
அப்போது 19வது திருத்தச் சட்டத்தின் கீழ் கடந்த அரசாங்கத்தினால் நியமிக்கப்பட்ட தேசிய பொலிஸ் ஆணைக்குழு இருந்தது. சில வாரங்களின் பின்னர், உயர் நீதிமன்றத்தில் நிலுவையில் உள்ள வழக்கு ஒன்றில் நீதிபதிகளுக்கு செல்வாக்கு செலுத்துவது தொடர்பாக அப்போதைய பிரதியமைச்சர் ரஞ்சன் ராமநாயக்கவுடன் தொலைபேசியில் உரையாடியமை தொடர்பில் விசாரணைகளை மேற்கொண்ட பொலிஸ் ஆணைக்குழு, குற்றப் புலனாய்வுத் திணைக்களத்தின் பணிப்பாளரை பணி இடை நிறுத்தியது.
சில மாதங்களுக்குப் பின்னர், முன்னாள் பிரதிப் பொலிஸ் மா அதிபர் ஒருவருக்கு எதிரான குற்றவியல் வழக்கில் பொய்யான சாட்சியங்களை உருவாக்கிய குற்றச்சாட்டின் பேரில் விசாரணைக்கு உட்படுத்தப்பட்டதைத் தொடர்ந்து அந்த அதிகாரி நீதிமன்றத்தால் விளக்கமறியலில் வைக்கப்பட்டார். எனவே, ஈஸ்டர் ஞாயிறு அன்று விசாரணைக்கு குந்தகம் விளைவிப்பதற்காக குற்றப் புலனாய்வு பணிப்பாளரை இடமாற்றம் செய்து, விளக்கமறியலில் வைத்தேன் என்று கர்தினால் முன்வைத்த குற்றச்சாட்டை நான் மறுக்கிறேன்.
குறித்த CID பணிப்பாளர் 2017ம் ஆண்டு அந்தப் பதவிக்கு நியமிக்கப்பட்டார் மற்றும் ஈஸ்டர் ஞாயிறு தாக்குதலின் பின்னர் ஏழு மாதங்களுக்கும் மேலாக அந்தப் பதவியில் தொடர்ந்தார். ஈஸ்டர் ஞாயிறு தாக்குதலுக்கு சில மாதங்களுக்கு முன்பு, அந்த பணிப்பாளரின் கீழ் இருந்த சிஐடி வவுணதீவு படுகொலைகள், மாவனல்லையில் புத்தர் சிலைகள் சேதப்படுத்தப்பட்டது மற்றும் தாக்குதலில் ஈடுபட்ட அதே நபர்கள் மற்றும் குழுக்களால் வனாத்தவில்லில் வெடிபொருட்களை பதுக்கி வைத்திருந்தது.
சட்டத்தை அமுல்படுத்தும் அதிகாரிகள் மிகவும் அவதானமாக இருந்திருந்தால் ஈஸ்டர் ஞாயிறு தாக்குதலுக்கு முன்னரே சஹ்ரான் உள்ளிட்டோரை கைது செய்து தாக்குதலை தடுத்திருக்க முடியும் என்றும் ஜனாதிபதி ஆணைக்குழு மிகத் தெளிவாகக் கூறியுள்ளது. அந்தத் தாக்குதலைத் தடுக்க முடியாமல் போனது சம்பந்தப்பட்ட பணிப்பாளரின் கீழுள்ள குற்றப் புலனாய்வுத் துறையின் தோல்வியாகும்.
ஈஸ்டர் ஞாயிறு குண்டுவெடிப்புக் குற்றவாளிகளை நீதியின் முன் நிறுத்தத் தவறிவிட்டதாக கார்தினால் என்னைக் குற்றம் சாட்டினார். எவ்வாறாயினும், குற்றவாளிகளை சட்டத்தின் முன் நிறுத்துவது அரசியல்வாதிகள் அல்ல, மாறாக பொலிஸ், சட்டமா அதிபர் திணைக்களம் மற்றும் நீதித்துறை அமைப்பு என்பன இணைந்து செயற்படுகின்றன. அந்த நடவடிக்கைகள் தற்போது நடைபெற்று வருவதாகவும் ஊடகங்களின் படி, ஈஸ்டர் ஞாயிறு தாக்குதல் தொடர்பில் 93 பேருக்கு எதிரான சட்ட நடவடிக்கைகள் ஏற்கனவே ஆரம்பிக்கப்பட்டுள்ளன.
ஈஸ்டர் ஞாயிறு தாக்குதல் இஸ்லாமிய தீவிரவாதிகளால் நடத்தப்பட்டது. அந்த நேரத்தில் அரசாங்கத்தின் உயர்மட்ட புலனாய்வுப் பிரிவான சிஐடி, 2019 ஈஸ்டர் ஞாயிறுக்கு முன்னர் பல மாதங்களுக்கு முன்னர் இருந்தே தற்கொலைக் குண்டுத் தாக்குதலுக்கு பின்னால் உள்ள தனிநபர்கள் மற்றும் குழுக்களின் செயல்பாடுகளை விசாரித்து வந்தது, ஆனால் தாக்குதலுக்கு முன்னர் சம்பந்தப்பட்ட பயங்கரவாதிகளை அவர்கள் கைது செய்யத் தவறிவிட்டனர்.
ஈஸ்டர் ஞாயிறு தற்கொலைத் தாக்குதல் தொடர்பாக நான் தொடர்ந்து குற்றம் சாட்டப்படுவதை பொதுமக்கள் கவனமாகப் பார்க்க வேண்டும்.
கோட்டாபய ராஜபக்ச
இலங்கையின் ஏழாவது நிறைவேற்று ஜனாதிபதி
