ஜனாதிபதி அநுர குமார திசாநாயக்க மற்றும் இலங்கைக்கு விஜயம் மேற்கொண்டுள்ள இந்திய பாதுகாப்பு அமைச்சர் ராஜ்நாத் சிங் ஆகியோருக்கு இடையிலான சந்திப்பைத் தொடர்ந்து, இலங்கைக்கும் இந்தியாவுக்கும் இடையில் பாதுகாப்பு ஒத்துழைப்பு தொடர்பான மூன்று புரிந்துணர்வு ஒப்பந்தங்கள் (MoU) கைச்சாத்திடப்பட்டுள்ளன.
இந்த ஒப்பந்தங்கள் இலங்கை மற்றும் இந்திய தேசிய மாணவர் படையணிகளுக்கு இடையிலான ஒத்துழைப்பு, இலங்கையின் தேசிய பாதுகாப்புக் கல்லூரிக்கும் புதுடெல்லியில் உள்ள இந்திய தேசிய பாதுகாப்புக் கல்லூரிக்கும் இடையிலான நிறுவன ரீதியான தொடர்புகளை வலுப்படுத்துதல் மற்றும் இலங்கை விமானப்படையினால் பயன்படுத்தப்படும் வான் பாதுகாப்பு அமைப்புகளுக்கான பராமரிப்பு உதவி ஆகியவற்றை உள்ளடக்கியுள்ளன.
வான் பாதுகாப்பு தொடர்பான ஒப்பந்தத்தின் கீழ், இலங்கை விமானப்படையிடம் தற்போது பயன்பாட்டில் உள்ள ஆறு 40 மில்லிமீற்றர் L70 வான் பாதுகாப்பு பீரங்கிகளுக்கான பராமரிப்பு உதவியை இந்தியா வழங்கவுள்ளது.
2000 முதல் 2006ஆம் ஆண்டு வரையான காலப்பகுதியில் இந்தியா இலங்கைக்கு 24 இத்தகைய வான் பாதுகாப்பு அமைப்புகளை வழங்கியிருந்ததுடன், அவற்றில் 18 அமைப்புகளுக்கு ஏற்கனவே பராமரிப்பு பணிகளையும் மேற்கொண்டுள்ளது.
இரு நாடுகளும் தங்களது நீண்டகால பாதுகாப்பு மற்றும் மூலோபாய கூட்டாண்மையை மேலும் வலுப்படுத்தும் முயற்சிகளில் ஈடுபட்டுள்ள நிலையில், இந்தியப் பெருங்கடல் பிராந்தியத்தின் கடல்சார் பாதுகாப்பு முக்கியத்துவம் வாய்ந்த ஒத்துழைப்புத் துறையாக உருவெடுத்துள்ளது.
ஜனாதிபதி அநுர குமார திசாநாயக்கவுடனான சந்திப்பைத் தொடர்ந்து கருத்து தெரிவித்த இந்திய பாதுகாப்பு அமைச்சர் ராஜ்நாத் சிங், சந்திப்பு “சுமுகமானதும் மிகவும் பயனுள்ளதுமானதாகவும்” அமைந்ததாகத் தெரிவித்துள்ளார்.
இந்திய பிரதமர் நரேந்திர மோடியின் வாழ்த்துக்களை ஜனாதிபதியிடம் தெரிவித்ததாகவும், ஜனாதிபதி அநுர குமார திசாநாயக்க தலைமையிலான அரசாங்கம் இரண்டு ஆண்டுகளை வெற்றிகரமாக நிறைவு செய்தமைக்கு வாழ்த்துக்களைத் தெரிவித்ததாகவும் அவர் குறிப்பிட்டுள்ளார்.
இலங்கையும் இந்தியாவும் “நாகரிக ரீதியாக இணைந்த இரு நாடுகள், நெருங்கிய அயல் நாடுகள் மற்றும் கடல்சார் பங்காளிகள்” எனக் குறிப்பிட்ட ராஜ்நாத் சிங், இரு நாடுகளின் அபிவிருத்தி மற்றும் மக்களின் நலனுக்காக தொடர்ந்து இணைந்து செயற்படுவதாகத் தெரிவித்துள்ளார்.
மேலும், பிராந்தியத்தின் பாதுகாப்பு, சமாதானம் மற்றும் செழிப்பை உறுதி செய்வதற்காக இரு நாடுகளும் கூட்டாகச் செயற்படும் எனவும் அவர் தெரிவித்துள்ளார்.
இந்த விஜயம் 38 ஆண்டுகளுக்குப் பின்னர் இந்திய பாதுகாப்பு அமைச்சர் ஒருவர் இலங்கைக்கு மேற்கொள்ளும் முதலாவது உத்தியோகபூர்வ விஜயம் என்பதால் முக்கியத்துவம் பெறுகிறது.
இதற்கு முன்னர் 1988ஆம் ஆண்டு இந்திய பாதுகாப்பு அமைச்சர் கே.சி. பந்த் இலங்கைக்கு விஜயம் செய்திருந்தார்.
ராஜ்நாத் சிங்கின் இந்த விஜயம் இரு நாடுகளுக்கும் இடையிலான பாதுகாப்புத் துறை உறவுகளை மேலும் ஆழப்படுத்தும் என எதிர்பார்க்கப்படுகிறது.
குறிப்பாக இராணுவப் பயிற்சி, தொழில்சார் கல்வி, உபகரணப் பராமரிப்பு மற்றும் கடல்சார் பாதுகாப்பு உள்ளிட்ட துறைகளில் ஒத்துழைப்பு மேலும் வலுப்பெறவுள்ளது.
இலங்கை – இந்தியா இடையிலான பரந்த பாதுகாப்பு ஒத்துழைப்புக் கட்டமைப்பை இந்தப் புதிய ஒப்பந்தங்கள் மேலும் வலுப்படுத்துவதுடன், இந்தியப் பெருங்கடல் பிராந்தியத்தில் நெருக்கமான பாதுகாப்பு உறவுகளைப் பேணுவதற்கு இரு நாடுகளும் வழங்கும் முக்கியத்துவத்தையும் எடுத்துக்காட்டுகின்றன.
இந்திய பாதுகாப்பு அமைச்சர் ராஜ்நாத் சிங் மூன்று நாள் உத்தியோகபூர்வ விஜயத்தை மேற்கொண்டு நேற்று பிற்பகல் இலங்கையை வந்தடைந்தார்.
