தேசிய மக்கள் சக்தி அரசாங்கத்திற்குள் எவ்வித கருத்து வேறுபாடுகளோ அல்லது நெருக்கடிகளோ இல்லை, சமூக வலைதளங்களில் பரப்பப்படும் தகவல்கள் முற்றிலும் அடிப்படையற்றவை. குறிப்பாக, பிரதமர் ஹரிணி அமரசூரிய தனித்துச் செயல்படப்போவதாகவும், கட்சிக்குள் முரண்பாடுகள் இருப்பதாகவும் வெளியாகும் தகவல்கள் அரசியல் உள்நோக்கம் கொண்ட வதந்திகள் என்பதால், மக்கள் இவற்றைப் பெரிதாக எடுத்துக்கொள்ளத் தேவையில்லை என்று கால்நடை மற்றும் விவசாய அமைச்சர் கே.டி.லால் காந்த தெரிவித்தார்.
கொழும்பில் புதன்கிழமை (16) நிகழ்வொன்றில் கலந்துகொண்டதன் பின்னர் ஊடகவியலாளர் எழுப்பிய கேள்விக்கு பதிலளிக்கும்போதே அவர் மேற்கண்டவாறு குறிப்பிட்டார்.
அங்கு அவர் மேலும் தெரிவிக்கையில்,
தற்போது உடனடியாக எந்தவொரு தேர்தலும் நடத்தப்படமாட்டாது எனத் தெரிவித்துள்ள அரசாங்கம், மாகாண சபைத் தேர்தலை நடத்துவதற்குத் தேவையான சட்ட ரீதியான ஏற்பாடுகள் மற்றும் எல்லை நிர்ணயப் பணிகள் பூர்த்தி செய்யப்பட்ட பின்னர் அது குறித்த அறிவிப்புகள் வெளியாகும். மேலும், திறைசேரியில் நிதி வசதிகள் இருந்தாலும், அதனை வினைத்திறனாக பயன்படுத்தும் வகையில் அரச நிர்வாக கட்டமைப்பை வலுப்படுத்துவதே தற்போதைய பிரதான சவாலாக உள்ளதுடன், பழைய அரசியல் கலாச்சாரத்தை மாற்றியமைத்து, ஊழல் மற்றும் மோசடிகளுக்கு எதிரான சட்ட நடவடிக்கைகளை அரசாங்கம் உறுதியுடன் முன்னெடுத்து வருகிறது.
இதனிடையே, பாராளுமன்ற உறுப்பினர் அர்ச்சுனாவின் நடத்தையானது ஏனைய உறுப்பினர்களிடமிருந்து மிகவும் மாறுபட்டு காணப்படுகிறது. அவர் ஒரு மருத்துவராக இருந்தபோதிலும், அவருக்கு ஏதேனும் மன அழுத்தமோ அல்லது மனநலப் பாதிப்போ இருக்கக்கூடும் என்ற சந்தேகம் எழுகிறது. இருப்பினும் அவரைத் தரக்குறைவாகப் பேசுவதற்காக இதனைச் சொல்லவில்லை, ஒரு மனிதனாக அவர் மீது அனுதாபம் கொண்டே அணுக வேண்டும்.
அத்துடன், தேசிய மக்கள் சக்தி அரசாங்கத்திற்குப் புலம்பெயர் அமைப்புகளிடம் இருந்து நிதியுதவி கிடைத்ததாக பாராளுமன்ற உறுப்பினர் அர்ச்சுனா முன்வைத்த குற்றச்சாட்டுகள் முற்றிலும் உண்மைக்குப் புறம்பானவை. ஆதாரமற்ற குற்றச்சாட்டுகளைச் சுமத்துபவர்களே அவற்றை நிரூபிக்க வேண்டும், இதுபோன்ற நபர்கள் பேசும் பொய்யான கருத்துகளுக்கெல்லாம் ஊடக அறிக்கைகளை வெளியிட்டுக்கொண்டிருக்க முடியாது, அவ்வாறு செய்ய ஆரம்பித்தால் அதற்கு என்று தனியாக ஒரு பிரிவை உருவாக்க வேண்டி வரும்.
மேலும், அர்ச்சுனாவைத் தமது மேடைகளில் பேச அனுமதித்த அரசியல் கட்சிகள், அவரது பேச்சு மற்றும் நடத்தை தங்களது கொள்கைகளுக்குப் பொருத்தமானதா என்பதைச் சிந்தித்து முடிவெடுத்திருக்க வேண்டும். இறுதியாக, அர்ச்சுனா எதையும் தீவிரத்தன்மையுடன் பேசுபவர் அல்ல என்பதால், அவரது பேச்சுகளால் சமூகத்தில் இனவாதப் பதற்றமோ அல்லது பெரிய அளவில் தாக்கங்கள் உருவாக வாய்ப்பில்லை. சிறிது காலத்தில் இத்தகைய ஆதாரமற்ற பேச்சுகள் மக்களால் பொருட்படுத்தப்படாமல் போய்விடும்.