Our Feeds


Tuesday, November 3, 2026

SHAHNI RAMEES

சமையல் எரிவாயு இல்லை எனக் கூறி 28 சிலிண்டர்களை மறைத்து வைத்திருந்த வர்த்தகருக்கு அபராதம் – அனைத்து சிலிண்டர்களையும் அரசுடைமையாக்க உத்தரவு!

 



நுகர்வோர் முறைப்பாடுகளின் அடிப்படையில் பாவனையாளர் அலுவல்கள் அதிகாரசபை மேற்கொண்ட விசேட சுற்றிவளைப்பில் மறைத்து வைக்கப்பட்டிருந்த 12.5 கிலோகிராம் நிறையுடைய 28 லிட்ரோ எரிவாயு சிலிண்டர்கள் கண்டுபிடிக்கப்பட்டன.

விற்பனைக்காக சமையல் எரிவாயு சிலிண்டர்கள் கையிருப்பில் இருந்தபோதிலும், எரிவாயு இல்லை எனக் கூறி நுகர்வோருக்கு விற்பனை செய்ய மறுத்த கண்டி பிரதேசத்தைச் சேர்ந்த வர்த்தகர் ஒருவருக்கு கண்டி நீதவான் நீதிமன்றம் அபராதம் விதித்துள்ளது. அத்துடன், சுற்றிவளைப்பின்போது கண்டுபிடிக்கப்பட்ட 12.5 கிலோகிராம் நிறையுடைய 28 லிட்ரோ எரிவாயு சிலிண்டர்களையும் அரசுடைமையாக்குமாறும் நீதிமன்றம் உத்தரவிட்டுள்ளது.

கண்டி, கொட்டுகொடெல்ல வீதி, இலக்கம் 124 இல் அமைந்துள்ள D.D. Gurusinghe Trading என்ற பெயரில் இயங்கும் லிட்ரோ எரிவாயு விற்பனை முகவர் நிலையத்தின் வர்த்தகருக்கு எதிராக இந்தச் சட்ட நடவடிக்கை மேற்கொள்ளப்பட்டுள்ளது.

நுகர்வோரிடமிருந்து கிடைக்கப்பெற்ற முறைப்பாடுகளைக் கருத்திற்கொண்டு, பாவனையாளர் அலுவல்கள் அதிகாரசபையின் கண்டி மாவட்ட விசாரணை அதிகாரிகளினால் 2026 ஒக்டோபர் 29 ஆம் திகதி இந்த விசேட சுற்றிவளைப்பு மேற்கொள்ளப்பட்டது.

இதன்போது பாவனையாளர் அலுவல்கள் அதிகாரசபையின் விசாரணை அதிகாரி ஒருவர் மறைமுகக் கொள்வனவாளராகச் சென்று, 12.5 கிலோகிராம் லிட்ரோ எரிவாயு சிலிண்டர் ஒன்றைக் கொள்வனவு செய்ய முயன்றுள்ளார். அப்போது குறித்த வர்த்தகர் தம்மிடம் எரிவாயு சிலிண்டர்கள் இல்லை எனத் தெரிவித்துள்ளார்.

எனினும், அதன் பின்னர் விசாரணை அதிகாரிகள் குறித்த வர்த்தக நிலையத்தைச் சோதனையிட்டபோது, 12.5 கிலோகிராம் நிறையுடைய 28 லிட்ரோ எரிவாயு சிலிண்டர்கள் அங்கு இருப்பது கண்டறியப்பட்டது.

இதனையடுத்து குறித்த எரிவாயு சிலிண்டர்கள் வழக்குச் சான்றுப் பொருட்களாக அதிகாரிகளின் பொறுப்பில் எடுக்கப்பட்டதுடன், வர்த்தகருக்கு எதிராக கண்டி நீதவான் நீதிமன்றத்தில் விடயங்கள் சமர்ப்பிக்கப்பட்டன.

⚖️ அபராதத்துடன் 28 எரிவாயு சிலிண்டர்களையும் அரசுடைமையாக்க நீதிமன்றம் உத்தரவு!

இந்தச் சம்பவம் தொடர்பான நீதிமன்ற நடவடிக்கைகளைத் தொடர்ந்து குறித்த வர்த்தகருக்கு அபராதம் விதிக்கப்பட்டுள்ளது. மேலும், சுற்றிவளைப்பின்போது கைப்பற்றப்பட்டு வழக்குச் சான்றுப் பொருட்களாகச் சமர்ப்பிக்கப்பட்ட 28 லிட்ரோ எரிவாயு சிலிண்டர்களையும் அரசுடைமையாக்குமாறு கண்டி நீதவான் நீதிமன்றம் உத்தரவிட்டுள்ளது.

இதன்படி, குறித்த எரிவாயு சிலிண்டர்கள் வர்த்தகரிடம் மீண்டும் ஒப்படைக்கப்படாமல், நீதிமன்ற உத்தரவின் பிரகாரம் அரசுடைமையாக்கப்படவுள்ளன.

2003 ஆம் ஆண்டின் 09 ஆம் இலக்க பாவனையாளர் அலுவல்கள் அதிகாரசபைச் சட்டத்தின் 16(அ) ஆம் பிரிவின்படி, வர்த்தக நோக்கத்திற்காகத் தமது உடைமையில், பொறுப்பில் அல்லது கட்டுப்பாட்டில் பொருட்கள் இருக்கும்போது, அவை தம்மிடம் இல்லை என நுகர்வோரிடம் தெரிவிப்பது சட்டவிரோதமானதாகும்.

நுகர்வோரைச் சிரமத்திற்கு உள்ளாக்கும் வகையில் பொருட்களை மறைத்து வைத்திருத்தல், கையிருப்பில் பொருட்கள் இருந்தும் இல்லை எனக் கூறுதல் மற்றும் நியாயமற்ற வர்த்தக நடவடிக்கைகளில் ஈடுபடுதல் போன்றவற்றைத் தடுப்பதற்காக பாவனையாளர் அலுவல்கள் அதிகாரசபை நாடளாவிய ரீதியில் சுற்றிவளைப்புகளையும் விசாரணைகளையும் தொடர்ச்சியாக மேற்கொண்டு வருகின்றது.

நுகர்வோர் முறைப்பாட்டின் அடிப்படையில் ஆரம்பிக்கப்பட்ட இந்த விசாரணை, நுகர்வோர் உரிமைகளைப் பாதுகாப்பதில் பொதுமக்களின் ஒத்துழைப்பு எவ்வளவு முக்கியமானது என்பதை எடுத்துக்காட்டுகின்றது.

📞 பொருட்கள் கையிருப்பில் இருந்தும் இல்லை எனக் கூறும் வர்த்தகர்கள் அல்லது ஏனைய நுகர்வோர் பாதுகாப்புச் சட்ட மீறல்கள் தொடர்பான தகவல்கள் இருப்பின், அலுவலக நேரங்களில் 1977 என்ற குறுந்தொலைபேசி இலக்கத்தின் ஊடாக பாவனையாளர் அலுவல்கள் அதிகாரசபைக்கு அறிவிக்கவும்.

Subscribe to this Blog via Email :
Previous
Next Post »