முன்னாள் ஜனாதிபதி ரணில் விக்ரமசிங்கவுக்கு எதிராக தொடரப்பட்ட வழக்கின் விசாரணையின் போது நீதிமன்ற அவமதிப்பு குற்றச்சாட்டில் நீதிமன்றத்தில் ஆஜர்படுத்தப்பட்ட கோட்டே மாநகர சபை உறுப்பினர் ஹர்ஷனி சந்தருவானி, கோட்டை நீதவான் இசுரு நெத்திகுமாரவால் வியாழக்கிழமை (18) பிணையில் விடுவிக்கப்பட்டார்.
தலா 500,000 ரூபாய் இரண்டு சரீரப் பிணைகளில் சந்தேக நபருக்கு நீதவான் பிணை வழங்கினார்.
பிணை வழங்கும் போது, நீதிமன்ற அவமதிப்புக்கு சமமான அரசியல் அறிக்கைகளை வெளியிடுவதைத் தவிர்க்குமாறு ஹர்ஷனி சந்தருவானியை நீதவான் எச்சரித்தார். அத்தகைய எந்தவொரு சந்தர்ப்பத்திலும் பிணை ரத்து செய்யப்பட்டு சந்தேக நபரை சிறையில் அடைக்க வழிவகுக்கும் நீதவான் எச்சரித்தார்.
ரணில் விக்கிரமசிங்கவுக்கு எதிரான வழக்கு விசாரணையின் போது சந்தேக நபர் அவமதிப்பு கருத்துக்களை தெரிவித்ததாகவும், அதன்படி அவர் கைது செய்யப்பட்டு நீதிமன்றத்தில் ஆஜர்படுத்தப்பட்டதாகவும் குற்றப் புலனாய்வுப் பிரிவு நீதிமன்றத்தில் தெரிவித்தது.
சந்தேக நபர் அளித்த சரியான வாக்குமூலம் என்னவென்று நீதவான் விசாரித்தார். "இது பெலவத்தையிலிருந்து வழங்கப்பட்ட தீர்ப்பு" என்று அவர் கூறியதாக குற்றப் புலனாய்வுப் பிரிவினர் தெரிவித்தனர்.
பின்னர் தொடர்புடைய காணொளியை நீதிமன்றத்தில் ஒளிபரப்ப நீதவான் உத்தரவிட்டார்.
சந்தேக நபருக்காக ஆஜரான வழக்கறிஞர் அஜித் பத்திரண, தனது கட்சிக்காரர் நீதிமன்ற அவமதிப்புக்கு சமமான எந்த செயலையும் செய்யவில்லை என்று நீதிமன்றத்தில் தெரிவித்தார். ரணில் விக்கிரமசிங்க காவலில் எடுத்து ரிமாண்ட் செய்யப்படுவார் என்று இரண்டு நாட்களுக்கு முன்பு ஒரு யூடியூபர் கணித்ததாகவும், அந்த விஷயத்தை விசாரிக்காமல் தனது கட்சிக்காரரை பொலிஸார் கைது செய்வது முறையற்றது என்றும் அவர் வாதிட்டார்.
சந்தேக நபர் சிறு குழந்தைகளின் தாய் மற்றும் தேர்ந்தெடுக்கப்பட்ட அரசியல் பிரதிநிதி என்றும், அவர் நீதித்துறையை அவமதிக்கவில்லை என்றும் மேலும் வாதிட்டார்.
அனைத்து சமர்ப்பிப்புகளையும் கருத்தில் கொண்டு, சந்தேக நபரை நீதவான் பிணையில் விடுதலை செய்தார்.
