2027ஆம் ஆண்டில் இலங்கையின் பல்வேறு அதிவேக நெடுஞ்சாலைத் திட்டங்களின் அபிவிருத்திப் பணிகளுக்காக 117,300 மில்லியன் ரூபாவை ஒதுக்குவதற்கு ஜனாதிபதி அநுரகுமார திஸாநாயக்க முன்மொழிந்துள்ளார்.
2027ஆம் ஆண்டுக்கான வரவு செலவுத் திட்டத்தை நாடாளுமன்றத்தில் சமர்ப்பித்த ஜனாதிபதி, மத்திய அதிவேக நெடுஞ்சாலையின் கடவத்தை – மீரிகம வரையான பகுதியின் நிர்மாணப் பணிகளுக்காக 53,450 மில்லியன் ரூபாவை ஒதுக்க முன்மொழிந்துள்ளார். இதன் நிர்மாணப் பணிகளை 2028 செப்டெம்பர் மாதத்திற்குள் நிறைவு செய்ய இலக்கு நிர்ணயிக்கப்பட்டுள்ளது.
அத்துடன், மத்திய அதிவேக நெடுஞ்சாலையின் பொத்துஹெர – ரம்புக்கனை வரையான பகுதிக்காக 4,500 மில்லியன் ரூபா ஒதுக்கப்பட்டுள்ளது. இதன் நிர்மாணப் பணிகளை 2027 மே மாதத்திற்குள் நிறைவு செய்ய எதிர்பார்க்கப்படுகிறது.
மேலும், ரம்புக்கனை – கலகெதர வரையான பகுதியின் அபிவிருத்திப் பணிகளுக்காக 2,350 மில்லியன் ரூபாவை ஒதுக்க அரசாங்கம் முன்மொழிந்துள்ளது. இத்திட்டத்தை 2029 ஜூலை மாதத்திற்குள் நிறைவு செய்ய இலக்கு நிர்ணயிக்கப்பட்டுள்ளது.
இதற்கிடையில், குருநாகல் – தம்புள்ளை அதிவேக நெடுஞ்சாலையின் முதற்கட்டப் பணிகளுக்காக 30,000 மில்லியன் ரூபா ஒதுக்கப்பட்டுள்ளது. இத்திட்டத்தின் கீழ் குருநாகல் – கலேவெல வரையான பகுதி அபிவிருத்தி செய்யப்படவுள்ளது.
அதேவேளை, ருவன்புர அதிவேக நெடுஞ்சாலையின் முதற்கட்ட அபிவிருத்திப் பணிகளுக்காக 27,000 மில்லியன் ரூபாவை ஒதுக்கவும் முன்மொழியப்பட்டுள்ளது. இதன் முதற்கட்டம் கஹதுடுவ முதல் இங்கிரிய வரையான பகுதியை உள்ளடக்கியுள்ளது.
