முன்னாள் ஜனாதிபதி மஹிந்த ராஜபக்ஷ, தனிப்பட்ட பிரச்சினை ஒன்றின் காரணமாக 2008ஆம் ஆண்டு எமிரேட்ஸ் நிறுவனத்துடனான கூட்டாண்மையை இரத்துச் செய்ததைத் தொடர்ந்து, ஸ்ரீலங்கன் எயார்லைன்ஸ் நிறுவனம் இதுவரை மொத்தம் 528 பில்லியன் ரூபா நட்டத்தைச் சந்தித்துள்ளதாக ஜனாதிபதி அநுரகுமார திஸாநாயக்க தெரிவித்துள்ளார்.
தேசிய விமான சேவை நிறுவனத்தின் கடன் சுமையைக் குறைப்பதற்கான வழிமுறைகளை ஆராய அமைச்சரவையினால் விசேட குழுவொன்று நியமிக்கப்பட்டுள்ளதாகக் குறிப்பிட்ட ஜனாதிபதி, இம்முயற்சிகளுக்கு நாடாளுமன்றத்தில் உள்ள அனைவரும் ஆதரவு வழங்க வேண்டும் என்றும் கோரிக்கை விடுத்தார்.
மேலும், வெளிநாடுகளில் பணிபுரியும் இலங்கையர்களுக்கு நன்றி தெரிவித்த ஜனாதிபதி, இவ்வாண்டு வெளிநாட்டுப் பணவனுப்பல்கள் 9 பில்லியன் அமெரிக்க டொலர்களைத் தாண்டும் என நாடு எதிர்பார்ப்பதாகவும் தெரிவித்தார்.
