உக்ரைன் மீது ரஷ்யா நடத்திய ட்ரோன் மற்றும்
ஏவுகணைத் தாக்குதல்களில் 26 பேர் உயிரிழந்துள்ளதுடன், 80க்கும் மேற்பட்டோர் காயமடைந்துள்ளனர்.இந்த ஆண்டில் இதுவரை சபோரிஷியா நகரில் நடந்த மிக மோசமான தாக்குதல்களில் ஒன்றாக, செவ்வாயன்று தென்கிழக்கு சபோரிஷியாவில் உள்ள ஒரு கார் பழுதுபார்க்கும் கடை மற்றும் குடியிருப்பு கட்டிடங்கள் மீது ரஷ்யாவின் சறுக்குக் குண்டுகள் தாக்கியதில் குறைந்தது 12 பேர் கொல்லப்பட்டதாக உக்ரைன் அதிகாரிகள் தெரிவித்தனர்.
இரவோடு இரவாக தாக்குதல்கள்
போல்டாவா மற்றும் கார்கிவ் பகுதிகளில் உள்ள உக்ரைன் அரசுக்குச் சொந்தமான எரிவாயு நிலையங்கள் மீதும் இரவோடு இரவாக ரஷ்யத் தாக்குதல்கள் நடத்தப்பட்டன.
நாஃப்டோகாஸ் நிறுவனத்தின் தலைமைச் செயல் அதிகாரி செர்ஹி கொரெட்ஸ்கியின் கூற்றுப்படி, மூன்று ஊழியர்களும் இரண்டு மீட்புப் பணியாளர்களும் கொல்லப்பட்டனர்.
"எங்களுக்குக் கணிசமான சேதமும் உற்பத்தி இழப்புகளும் ஏற்பட்டுள்ளன. இது ஆளில்லா ட்ரோன்கள் மற்றும் பாலிஸ்டிக் ஏவுகணைகளின் ஒருங்கிணைந்த தாக்குதல் ஆகும்," என்று கொரெட்ஸ்கி கூறினார்.
இந்தத் தாக்குதலால் கிட்டத்தட்ட 3,500 வாடிக்கையாளர்களுக்கு எரிவாயு விநியோகம் துண்டிக்கப்பட்டதாக அவர் மேலும் கூறினார்.
