அடுத்த ஆண்டு நடைமுறைக்கு வரவிருக்கும் புதிய கல்வி சீர்திருத்தங்களை நடைமுறைப்படுத்த அரசாங்கம் போதுமான அளவு தயாராக இல்லை என்று இலங்கை ஆசிரியர் சங்கம் குற்றம் சாட்டியுள்ளது.
கல்வி சீர்திருத்தங்களை நடைமுறைப்படுத்துவதற்குத் தேவையான ஆசிரியர் பயிற்சித் திட்டங்களும் இன்னும் முடிக்கப்படவில்லை என்று இலங்கை ஆசிரியர் சங்க பொதுச் செயலாளர் ஜோசப் ஸ்டாலின் கூறியுள்ளார்.
அடுத்த ஆண்டு முதல் ஒன்றாம் மற்றும் ஆறாம் வகுப்புகளுக்கு புதிய கல்வி சீர்திருத்தங்களை அறிமுகப்படுத்த அரசாங்கம் திட்டமிட்டுள்ளது.
இருப்பினும், அவற்றை வெற்றிகரமாக நடைமுறைப்படுத்துவதை உறுதிசெய்ய முறையான திட்டம் எதுவும் இன்னும் நடைமுறையில் இல்லை என்று ஸ்டாலின் கூறியுள்ளார்.
இது தொடர்பில் அவர் கூறுகையில், “இந்த சீர்திருத்தங்கள் அடுத்த ஆண்டு அறிமுகப்படுத்தப்பட திட்டமிடப்பட்டிருந்தாலும், ஒன்றாம் மற்றும் ஆறாம் வகுப்புகளுக்கான சீர்திருத்தங்கள் திட்டமிட்டபடி தொடரும்.
இருப்பினும், இதற்கான ஆசிரியர் பயிற்சி இன்னும் மெதுவாகவே நடைபெற்று வருகிறது.
இந்த சீர்திருத்தங்கள், கோட்டாபய ராஜபக்ச அரசாங்கத்தால் அறிமுகப்படுத்தப்பட்ட சீர்திருத்தங்களின் தொடர்ச்சியே என்பது தெளிவாகிறது. அவை நடைமுறைப்படுத்தப்படாமல் முழுமையடையாமல் விடப்பட்ட சீர்திருத்தங்களின் நீட்டிப்பாகும்.” என்று கூறியுள்ளார்.
