2015ஆம் ஆண்டு ஜனாதிபதித் தேர்தலுக்கு முன்னதாக, முன்னாள் ஜனாதிபதி மைத்திரிபால சிறிசேனவுக்கு அந்த வாய்ப்பு வழங்கப்படுவதற்கு முன்பே, தன்னை பொது எதிரணி வேட்பாளராக களமிறங்குமாறு அணுகப்பட்டதாக முன்னாள் அமைச்சர் நிமல் சிறிபால டி சில்வா தெரிவித்துள்ளார்.
இலங்கை சுதந்திரக் கட்சியின் (SLFP) 75ஆவது ஆண்டு நிறைவை முன்னிட்டு நடைபெற்ற நிகழ்வில் உரையாற்றிய அவர், ஜனாதிபதி பதவியை விட கட்சிக்கு விசுவாசமாக இருப்பதையே தான் தெரிவுசெய்ததாகக் கூறினார்.
“2015ஆம் ஆண்டு தேர்தலில் மைத்திரிபால சிறிசேன கட்சியை விட்டு வெளியேறி பொது வேட்பாளராக போட்டியிட்டது உங்களுக்குத் தெரியும். அவருக்கு முன்னதாகவே என்னை அணுகினர். ஆனால், ஜனாதிபதி பதவியை விட இந்தக் கட்சியை நான் அதிகமாக நேசித்தேன். அதனால்தான் இன்றும் நான் இந்தக் கட்சியில் இருக்கிறேன்” என அவர் தெரிவித்தார்.
தொடர்ந்தும் ஸ்ரீலங்கா சுதந்திரக் கட்சியில் தான் ஈடுபட்டு வருவதற்கு கட்சியின் மீதான தனது அர்ப்பணிப்பே காரணம் என நிமல் சிறிபால டி சில்வா குறிப்பிட்டார்.
மேலும், கட்சியின் எதிர்கால தலைமைத்துவம் உள்மோதல்களால் பிளவுபட்ட குழுக்களிடம் வழங்கப்படாமல், ஒன்றுபட்ட இளம் தலைமுறையினரிடம் ஒப்படைக்கப்பட வேண்டும் என்றும் அவர் வலியுறுத்தினார்.
“இளைஞர்கள் இந்தக் கட்சியை பொறுப்பேற்க வேண்டும் என்று நான் எப்போதும் கூறி வந்துள்ளேன். ஆனால், அவர்களுக்குள் ஒருவருக்கொருவர் மோதிக்கொள்ளும் குழுவாக அது இருக்கக்கூடாது. ஒன்றுபட்ட இளைஞர் குழுவொன்று கட்சியை பொறுப்பேற்க வேண்டும்” என அவர் கூறினார்.
தற்போது தான் வகிக்கும் எந்தவொரு பதவியையும் தேவைப்பட்டால் விட்டுக்கொடுக்கத் தயாராக இருப்பதாகவும் நிமல் சிறிபால டி சில்வா மேலும் தெரிவித்தார்.
