அனுராதபுரத்தில் நடைபெறவுள்ள பேரணியை அஞ்சியே தம்மை கைது செய்ய முயற்சிக்கப்படுவதாக நாடாளுமன்ற உறுப்பினர் நாமல் ராஜபக்ஷ தெரிவித்த கருத்தை அமைச்சர் நளிந்த ஜயதிஸ்ஸ நிராகரித்துள்ளார்.
இது தொடர்பாக ஊடகங்களுக்கு கருத்து தெரிவித்த அமைச்சர் நளிந்த ஜயதிஸ்ஸ, நாமல் ராஜபக்ஷவுக்கு எதிராக எடுக்கப்படும் நடவடிக்கைகள் அனைத்தும் நீதிமன்ற நடைமுறைகளின் அடிப்படையிலேயே நடைபெறுகின்றன என்றார். மேலும், தாம் என்ன செய்திருக்கிறார் என்பது நாமல் ராஜபக்ஷவுக்கே நன்றாகத் தெரியும் என்றும் குறிப்பிட்டார்.
குற்றப்புலனாய்வுத் திணைக்களம் (CID), நிதி குற்றப்புலனாய்வுப் பிரிவு (FCID), இலஞ்ச ஊழல் ஆணைக்குழு உள்ளிட்ட அமைப்புகள், நாமல் ராஜபக்ஷ தொடர்பான அனைத்து விடயங்களையும் இன்னும் முழுமையாக வெளிக்கொண்டு வரவில்லை என்றும் அவர் தெரிவித்தார்.
தவறுகள் இடம்பெற்றுள்ளதை ஆதாரங்களுடன் நிரூபிப்பதே விசாரணைகளின் நோக்கம் என்றும், தவறு செய்த ஒருவர் அச்சமடைவது இயல்பான விடயமே என்றும் அமைச்சர் கூறினார்.
மேலும், தன்னை கைது செய்யப் போகிறார்கள் என்று நாமல் ராஜபக்ஷ உண்மையிலேயே நம்பியிருந்தால், செப்டம்பர் 12-ஆம் தேதியை காத்திருக்காமல் அதற்கு முன்னரே பேரணியை நடத்தியிருக்க வேண்டும் என்றும் அவர் கிண்டலாகக் குறிப்பிட்டார்.
தவறு செய்தது நிரூபிக்கப்பட்ட எவராக இருந்தாலும் சட்டத்தின் முன் நடவடிக்கை எடுக்கப்படும் என்றும், சட்ட நடைமுறைகளில் இருந்து தப்பிக்க முயற்சிக்காமல் நாமல் ராஜபக்ஷ அவற்றை எதிர்கொள்ள வேண்டும் என்றும் அமைச்சர் நளிந்த ஜயதிஸ்ஸ வலியுறுத்தினார்.
