நாட்டில் நிலவும் பொருளாதார நெருக்கடிகளுக்கு மத்தியில் மக்கள் பிரதிநிதிகள் முன்மாதிரியாகச் செயல்பட வேண்டும் எனக் கூறி, நாடாளுமன்ற உறுப்பினர்களுக்காக வழங்கப்பட்டுள்ள மருத்துவக் காப்பீட்டு வசதியைத் தாம் கௌரவத்துடன் நிராகரிப்பதாக ஐக்கிய தேசியக் கட்சியின் முன்னாள் பிரதித் தலைவரும் நாடாளுமன்ற உறுப்பினருமான ரவி கரணாநாயக்க சபாநாயகருக்கு எழுத்து மூலம் அறிவித்துள்ளார்.
இதற்கு முன்னர் 2026 ஆம் ஆண்டிலும் இவ்வாறானதொரு வசதி வழங்கப்பட்ட சந்தர்ப்பத்தில் தாம் அதை நிராகரித்ததுடன், அந்த நிதியை அர்த்தமுள்ள மக்கள் நலன் சார்ந்த காரியங்களுக்குப் பயன்படுத்துமாறு கோரியிருந்ததையும் அவர் சுட்டிக்காட்டியுள்ளார்.
பெரும்பாலான குடிமக்கள் இன்னமும் கடுமையான பொருளாதார சவால்களை எதிர்கொண்டு வரும் இக்காலகட்டத்தில், மக்கள் சேவை செய்ய வாய்ப்புப் பெற்றவர்கள் மக்களுடன் ஒத்துழைப்புடனும் உணர்வுப்பூர்வமாகவும் செயற்பட வேண்டும் என எம்பி வலியுறுத்தியுள்ளார்.
இந்தத் திட்டத்தின் கீழ் தனக்குக் கிடைக்கவிருக்கும் நிதியை, ஆபத்தான நிலையில் உள்ள நபர்கள், சிறுவர்கள், முதியவர்கள் அல்லது கொடிய நோய்களால் பாதிக்கப்பட்டுள்ள ஆதரவற்ற மக்களின் நலனுக்காகச் சட்டப்பூர்வமாகவும் நிர்வாக ரீதியாகவும் சாத்தியமான வழிகளில் மீண்டும் பயன்படுத்துமாறு அவர் கேட்டுக்கொண்டுள்ளார்.
சலுகைகளை விட மக்கள் சேவைக்கு முன்னுரிமை அளித்தல் மற்றும் அரச வளங்களைச் சரியாக மேலாண்மை செய்தல் ஆகிய கோட்பாடுகளுக்கு அமையவே இத்தீர்மானம் எடுக்கப்பட்டதாகவும், உண்மையான தலைமைத்துவம் என்பது முன்னுதாரணமாகத் திகழ்வதே என்றும் அவர் மேலும் சுட்டிக்காட்டியுள்ளார்.
