காலநிலை மாற்றத்தை எதிர்கொள்வதற்கான அவசர நடவடிக்கைகள், காஸாவுக்கு தடையின்றி மனிதாபிமான உதவிகளை வழங்குதல் மற்றும் சர்வதேச கடன் விதிமுறைகளை நியாயமானதாக மாற்றுதல் உள்ளிட்ட விடயங்களுக்கு இலங்கை அழைப்பு விடுத்துள்ளது.
செப்டம்பர் 28ஆம் திகதி ஐக்கிய நாடுகள் பொதுச் சபையில் இலங்கையின் தேசிய அறிக்கையை முன்வைத்து உரையாற்றிய வெளிவிவகார அமைச்சர் விஜித ஹேரத், உலகளாவிய கார்பன் உமிழ்வுக்கு குறைந்த பங்களிப்பை வழங்கும் நாடுகளே காலநிலை மாற்றத்தின் கடுமையான விளைவுகளை எதிர்கொள்வதாக தெரிவித்தார்.
‘டிட்வா’ சூறாவளியால் இலங்கையில் நூற்றுக்கணக்கானோர் உயிரிழந்ததுடன், 20 இலட்சத்துக்கும் அதிகமானோர் பாதிக்கப்பட்டதாகவும், வாழ்வாதாரங்கள் மற்றும் உட்கட்டமைப்புகள் சேதமடைந்ததாகவும் அவர் குறிப்பிட்டார்.
2030ஆம் ஆண்டுக்குள் 70 சதவீத புதுப்பிக்கத்தக்க எரிசக்தியைப் பயன்படுத்துவதற்கும், 2050ஆம் ஆண்டுக்குள் கார்பன் நடுநிலையை அடைவதற்கும் இலங்கை நடவடிக்கை எடுத்து வருவதாகவும் அமைச்சர் தெரிவித்தார்.
காஸா மற்றும் ஆக்கிரமிக்கப்பட்ட பாலஸ்தீனப் பகுதிகளில் நிலவும் மனிதாபிமான நெருக்கடி குறித்து கவலை தெரிவித்த அவர், ஐ.நா. பாதுகாப்புச் சபையின் போர் நிறுத்தத் தீர்மானத்தை அனைத்து தரப்பினரும் கடைப்பிடிக்க வேண்டும் என்றும், பொதுமக்களுக்கு மனிதாபிமான உதவிகள் தடையின்றி சென்றடைய வேண்டும் என்றும் வலியுறுத்தினார்.
மேலும், காஸாவின் மீட்பு மற்றும் புனரமைப்பை அவசர முன்னுரிமையாகக் கருத வேண்டும் எனவும், 1967ஆம் ஆண்டுக்கு முன்னைய எல்லைகளை அடிப்படையாகக் கொண்ட சுதந்திரமான பாலஸ்தீன அரசை இஸ்ரேலுடன் இணைந்து உருவாக்குவதற்கு இலங்கை ஆதரவளிப்பதாகவும் அவர் தெரிவித்தார்.
2022ஆம் ஆண்டு பொருளாதார நெருக்கடியின் பின்னர் இலங்கை பொருளாதார ஸ்திரத்தன்மையை மீட்டெடுத்துள்ள போதிலும், கடன் மற்றும் வெளிப்புற பொருளாதார அதிர்ச்சிகளுக்கு நாடு தொடர்ந்து பாதிக்கப்படக்கூடிய நிலையில் இருப்பதாகவும் அமைச்சர் சுட்டிக்காட்டினார்.
இதனால், சர்வதேச நிதி அமைப்பில் சீர்திருத்தங்களை மேற்கொண்டு, கடன் மற்றும் அபிவிருத்தி நிதியுதவி தொடர்பான விதிமுறைகளை நியாயமானதாக மாற்ற வேண்டும் என இலங்கை மீண்டும் வலியுறுத்தியுள்ளது.
இதேவேளை, நாட்டின் உள்நாட்டுப் போர் தொடர்பான நிலுவைப் பிரச்சினைகளுக்கு தீர்வு காணவும், அரசியல் தலையீடின்றி ஊழல் விசாரணைகள் மற்றும் வழக்குத் தொடர்வுகளை முன்னெடுக்கவும் அரசாங்கம் நடவடிக்கை எடுத்து வருவதாகவும் விஜித ஹேரத் தெரிவித்தார்.
செயற்கை நுண்ணறிவின் (AI) நெறிமுறைப் பயன்பாட்டிற்கான தேசிய வழிகாட்டுதல்களை இலங்கை உருவாக்கியுள்ளதாகவும் அவர் குறிப்பிட்டார்.
