சபாநாயகர் ஜகத் விக்ரமரத்னவுக்கு எதிராக எதிர்க்கட்சியினரால் கொண்டுவரப்படும் நம்பிக்கையில்லாப் பிரேரணை இன்று (9) பாராளுமன்றத்தில் சமர்ப்பிக்கப்படவுள்ளது.
சபாநாயகருக்கு எதிரான 49 குற்றச்சாட்டுகளை அடிப்படையாகக் கொண்டு இந்த நம்பிக்கையில்லாப் பிரேரணை வரைவு செய்யப்பட்டுள்ளதாகத் தெரிவிக்கப்படுகிறது.
பாராளுமன்ற நடைமுறைகளைக் கையாளும்போது சபாநாயகர் பின்பற்றிய சார்புநிலை மற்றும் ஜனநாயகத்துக்கு முரணான செயற்பாடுகள் காரணமாக அவர் அந்தப் பதவிக்கு தகுதியற்றவர் எனக் குற்றம் சாட்டியே எதிர்க்கட்சியினரால் இந்த நம்பிக்கையில்லாப் பிரேரணை கொண்டுவரப்படுகின்றது.
தமது கட்சி இதற்கு முன்னர் சமர்ப்பித்த சிறப்புரிமைப் பிரச்சினைகள் மற்றும் பிரேரணைகளை எவ்வித நியாயமான காரணமும் இன்றி சபாநாயகர் நிராகரித்ததாக ஐக்கிய மக்கள் சக்தியும் குற்றம் சுமத்தியுள்ளது.
பாராளுமன்றத்திலுள்ள எதிர்க்கட்சித் தலைவர் அலுவலகத்தில் எதிர்க்கட்சித் தலைவர் சஜித் பிரேமதாச தலைமையில் நேற்று (8) இந்த நம்பிக்கையில்லாப் பிரேரணையில் கையெழுத்திடும் பணிகள் ஆரம்பிக்கப்பட்டதுடன், அதில் முதல் கையெழுத்தை சஜித் பிரேமதாச பதிவிட்டார்.
எதிர்க்கட்சி பாராளுமன்ற உறுப்பினர்களால் கையொப்பமிடப்பட்ட குறித்த நம்பிக்கையில்லாப் பிரேரணை, பாராளுமன்ற செயலாளர் நாயகத்திடம் இன்று கையளிக்கப்படும் என ஐக்கிய மக்கள் சக்தியின் பாராளுமன்ற உறுப்பினர் அஜித் பி. பெரேரா தெரிவித்துள்ளார்.
