(எம்.ஆர்.எம்.வசீம், இராஜதுரை ஹஷான்)
எவரையும் பழிவாங்கவேண்டிய தேவை எமக்கு இல்லை. நாங்கள் அவ்வாறு நினைக்கவுமில்லை. அவ்வாறு நினைத்தால் விளைவுகள் பாரதூரமானதாக அமையும். மக்களால் புறக்கணிக்கப்பட்ட தரப்பினர் மீண்டும் ஒருபோதும் ஆட்சிக்கு வரமாட்டார்கள். ஒன்று நாங்கள் மீண்டும் வருவோம். அல்லது எங்களை விட சிறந்த தரப்பினர் ஆட்சிக்கு வருவார்கள். மஹிந்த மற்றும் ரணில் ஆட்சியில் ஊழலுக்குப் பழக்கப்பட்டவர்கள் இன்று நீதிமன்றத்தால் தண்டிக்கப்படுகிறார்கள். இதில் எமது தலையீடு ஏதும் இல்லை. 2015ஆம் ஆண்டுக்கு பின்னர் தாக்கல் செய்யப்பட்ட வழக்குகளுக்கு அமையவே தற்போது கைதுகள் இடம்பெறுகின்றன என்று சபை முதல்வரும், அமைச்சருமான பிமல் ரத்நாயக்க தெரிவித்தார்.
பாராளுமன்றத்தில் வியாழக்கிழமை (8) நடைபெற்ற ஊழல் எதிர்ப்பு (திருத்தச்) சட்டமூலம் மீதான விவாதத்தில் உரையாற்றுகையில் மேற்கண்டவாறு குறிப்பிட்டார்.
அங்கு அவர் மேலும் உரையாற்றுகையில்,
ஊழலுக்கு எதிராக கடுமையான நடவடிக்கைகளை முன்னெடுப்பதும், ஊழல்வாதிகளை சட்டத்தின் முன் நிறுத்துவதும் அரசியல் பழிவாங்கல் அல்ல. அது அரச நிர்வாக கட்டமைப்பின் ஒரு பகுதியாகும். ஊழலுக்கு எதிராக கடுமையான நடவடிக்கைகளை எடுக்கவேண்டும் என்பதற்காகவே மக்கள் எமக்கு ஆணை வழங்கினார்கள். அந்த ஆணையையே கடுமையாக செயற்படுத்துகிறோம். இதில் எவ்வித தவறும் கிடையாது.
இலஞ்ச ஊழல் ஆணைக்குழுவின் சட்டத்தை வலுப்படுத்துவதற்காகவும், நடைமுறையில் காணப்படும் சிக்கல்களுக்கு தீர்வு காண்பதற்காகவே ஊழல் எதிர்ப்பு (திருத்தச்) சட்டமூலம் கொண்டுவரப்பட்டது. அரச நிறுவனங்களின் வருவாய் கிடைப்பனவு அதிகரிக்கப்பட்டுள்ளது.
வரி செலுத்தல் தற்போது கட்டாயமாக்கப்பட்டுள்ளது. இலஞ்ச ஊழல் விசாரணை ஆணைக்குழுவின் சுயாதீனம் மற்றும் கடுமையான செயற்பாடுகளின் ஊடாகவே இந்த மாற்றம் ஏற்பட்டுள்ளது.
சட்டம் அனைவருக்கும் பொதுவானது. சட்டத்தில் எவருக்கும் சிறப்பு சலுகை வழங்கப்படமாட்டாது. ஊழல்வாதிகளை பாதுகாக்கவேண்டிய அவசியம் எமக்கு கிடையாது. உலகில் முன்னேற்றமடைந்துள்ள நாடுகள் ஊழலுக்கு எதிராக கடுமையான நடவடிக்கைகளை முன்னெடுத்து தான் பொருளாதாரம் மற்றும் சமூக கட்டமைப்பில் முன்னேற்றமடைந்துள்ளன. அவ்வாறான நடவடிக்கைகளை இங்கு முன்னெடுக்கும்போது ஊழல்வாதிகளும், எதிர்க்கட்சிகளும் அரசியல் பழிவாங்கல் என்று குறிப்பிடுகிறார்கள்.
ஊழலற்ற அரச நிர்வாகம் வேண்டும், பலமான பொலிஸ் சேவை வேண்டும் என்று மக்கள் குறிப்பிடுகிறார்கள். ஆனால் எதிர்க்கட்சியினர் அதற்கு எதிர்ப்பு தெரிவிக்கிறார்கள். போலியான குற்றச்சாட்டுக்களை முன்வைத்து ஊழலுக்கு எதிரான நடவடிக்கைகளை தடுக்கிறார்கள். ஊழல்வாதிகள் கைது செய்யப்படும்போது அவர்களை கொண்டாடுகிறார்கள். இது முற்றிலும் கீழ்த்தரமானதொரு செயற்பாடாகும். எதிர்க்கட்சியினர் ஊழலுக்கு எதிர்ப்பு, ஆனால் ஊழலுக்கு எதிராக முன்னெடுக்கும் நடவடிக்கைகளுக்கு எதிர்ப்பு என்ற நிலைப்பாட்டில் இருந்துகொண்டு செயற்படுகிறார்கள்.
நாங்கள் ஆட்சிக்கு வந்ததன் பின்னர் புதிதாக எவருக்கு எதிராகவும் வழக்குத் தாக்கல் செய்யவில்லை. தற்போதைய கைதுகள் 2015ஆம் ஆண்டுக்கு பின்னரே தாக்கல் செய்யப்பட்டது. ஆனால் எவ்வித நடவடிக்கைகளும் பிற்பட்ட காலத்தில் எடுக்கப்படவில்லை. டீல் செய்து வழக்குகளில் இருந்து தப்பித்துக்கொண்டார்கள். அந்த நிலைமை தற்போது கிடையாது என்பதால் சட்டத்தின் பிரகாரம் கைதுகள் இடம்பெறுகின்றன. அதனால்தான் அரசியல் பழிவாங்கல் என்று குறிப்பிடுகிறார்கள்.
ராஜபக்ஷ குடும்பத்துக்கு இல்லாத வழக்குகள் ஏதும் இல்லை. இந்த வழக்குகள் அனைத்தும் 2015ஆம் ஆண்டுக்கு பின்னரே தாக்கல் செய்யப்பட்டது. இந்த குடும்பத்தில் உள்ள ஒவ்வொருவருக்கும், பல வழக்குகள் உள்ளன. சகல மோசடிகளிலும் ஏதாவதொரு வழியில் தொடர்புபட்டுள்ளார்கள். ஷிரந்தி ராஜபக்ஷ சிரிலிய கணக்கு மோசடியில் தற்போது கைது செய்யப்பட்டுள்ளார். இவரை இலங்கையின் மாதா என்று ஒருசிலர் தற்போது குறிப்பிடுகிறார்கள். இது இவர்களின் அறியாமையையே வெளிப்படுத்துகிறது.
அரசியல் பழிவாங்கலை முன்னெடுக்க வேண்டுமாயின் ஆட்சிக்கு வந்து ஒரு வருட காலத்தில் பலரை கைது செய்திருப்போம். வழக்குகளை முறையாக விசாரணைகளை செய்வதற்கு அரசாங்கம் என்ற அடிப்படையில் தொடர்புடைய நிறுவனங்களுக்கான வசதிகளை வழங்கினோம். நீதிமன்றங்கள் உரிய நடவடிக்கைகளை முன்னெடுத்துள்ளன. இதில் அரசாங்கம் எவ்வகையில் தலையிட்டுள்ளது.
ஊழல்வாதிகள் சிறை செல்லும்போது அவர்களின் குடும்பத்தாருக்கு தனிப்பட்ட முறையில் பிரச்சினைகள் ஏற்படும் என்பதை நாங்கள் அறிவோம். இதற்கு எம்மால் ஏதும் செய்ய முடியாது. ஊழல்மிக்க அரச தலைவர்களால் ஆக்கிரமிக்கப்பட்ட ஒருசில அரச அதிகாரிகளும் ஊழல் மோசடிகளுக்கு பழக்கப்பட்டுள்ளார்கள். அவர்களுக்கு எதிராகவும் உரிய சட்ட நடவடிக்கைகள் எடுக்கப்பட்டுள்ளன. மஹிந்த, ரணில் காலத்தில் ஊழலுக்கு பழக்கப்பட்டவர்கள் தற்போது நீதிமன்றத்தால் தண்டிக்கப்படுகிறார்கள். இதில் எமது தவறு என்ன உள்ளது.
எவரையும் பழிவாங்கவேண்டிய தேவை எமக்கு இல்லை. நாங்கள் அவ்வாறு நினைக்கவுமில்லை. அவ்வாறு நினைத்தால் விளைவுகள் பாரதூரமானதாக அமையும். மக்களால் புறக்கணிக்கப்பட்ட தரப்பினர் மீண்டும் ஒருபோதும் ஆட்சிக்கு வரமாட்டார்கள். ஒன்று நாங்கள் மீண்டும் வருவோம். அல்லது எங்களை விட சிறந்த தரப்பினர் ஆட்சிக்கு வருவார்கள். எதிர்க்கட்சிகளில் உள்ள சிறந்த உறுப்பினர்கள் ஊழல்வாதிகளுக்கு துணைபோக கூடாது என்று குறிப்பிட்டுக்கொள்கிறேன்.
22ஆவது திருத்தம் கொண்டுவரப்பட்டபோது நீதித்துறையின் அதிகாரத்தை ஜனாதிபதி ஆக்கிரமிக்கப்போவதாக குற்றஞ்சாட்டினார்கள். ஆனால் தற்போது ஒருசில வழக்கு விவகாரத்தில் ஜனாதிபதி தலையிடவேண்டும் என்று எதிர்க்கட்சியினர் குறிப்பிடுகிறார்கள். தங்களுக்கு ஏற்றாற்போல் எதிர்க்கட்சியினர் அடிப்படை கொள்கைகளை மாற்றிக்கொள்கிறார்கள் என்றார்.
