சவுதி அரேபியாவில் முன்னறிவிப்பின்றி இரண்டு
பங்களாதேஷ் பிரஜைகள் மரண தண்டனைக்கு உட்படுத்தப்பட்டமை தொடர்பில் பங்களாதேஷ் அரசாங்கம் சவுதி அரேபியாவின் கவனத்திற்கு கொண்டு சென்றுள்ளது.சவுதி அரேபியாவின் உள்துறை அமைச்சகத்தின்படி, மக்காவில் உள்ள மசூதியொன்றுக்குள் "தகாத செயலில்" ஈடுபட்டதாகக் குற்றம் சாட்டப்பட்டு தண்டனைப் பெற்ற பங்களாதேஷைச் சேர்ந்த ஒரு ஆணும் பெண்ணும் அக்டோபர் 14 அன்று மரண தண்டனைக்கு உட்படுத்தப்பட்டனர்.
இருப்பினும், மரண தண்டனைகள் நிறைவேற்றப்பட்ட பின்னர்தான் தமக்குத் தெரியவந்ததாக பங்களாதேஷ் அதிகாரிகள் தெரிவித்தனர். சவுதி அதிகாரிகளிடமிருந்து முன்கூட்டியே தகவல் தெரிவிக்கப்படாமை குறித்து இது கேள்விகளை எழுப்பியுள்ளது.
பங்களாதேஷின் வெளியுறவுத்துறை இணை அமைச்சர் ஷமா ஒபைத் இஸ்லாம், இந்த குற்றச்சாட்டுகள் மற்றும் மரண தண்டனைக்கு வழிவகுத்த சட்ட நடவடிக்கைகள் குறித்து விளக்கம் கோரியுள்ளதாகத் தெரிவித்தார்.
குற்றச்சாட்டின் உண்மையான தன்மை குறித்து சவுதி அதிகாரிகள் இதுவரை பகிரங்கமாக எதையும் குறிப்பிடவில்லை.
ஊடக அறிக்கைகளின்படி, ஜெட்டாவில் உள்ள பங்களாதேஷ் துணைத் தூதரகத்திற்கு சவுதி அரேபியாவால் வழங்கப்பட்ட பங்களாதேஷ் கைதிகள் பட்டியலில் இந்த இரு நபர்களின் பெயர்களும் இடம்பெற்றிருந்தன. இருப்பினும், அவர்களுக்கு மரண தண்டனை விதிக்கப்பட்டிருப்பதை அந்தப் பட்டியல் சுட்டிக்காட்டவில்லை எனத் கூறப்படுகிறது.
சவுதி அரேபியாவில் மூன்று மில்லியனுக்கும் அதிகமான பங்களாதேஷிகள் வாழ்ந்து வேலை செய்கின்றனர். மரண தண்டனைகள் நிறைவேற்றப்படுவதற்கு முன்பு அரசாங்கத்திற்கு ஏன் தெரிவிக்கப்படவில்லை என்ற கேள்விகள் எழுந்துள்ளதால், இந்த மரண தண்டனை பங்களாதேஷில் கவலையை ஏற்படுத்தியுள்ளது.
பங்களாதேஷ் வெளியுறவு அமைச்சகமும் அக்டோபர் 18 அன்று டாக்காவில் உள்ள சவுதி தூதுவரை நேரடியாக அழைத்து, நடவடிக்கைகள் அல்லது மரண தண்டனை நிறைவேற்றப்பட்டமை குறித்து ஏன் தங்களுக்குத் தெரிவிக்கப்படவில்லை என்பது தொடர்பில் விளக்கம் கோரியுள்ளது.
பங்களாதேஷ் ஊடகங்களின்படி, சவுதி அரேபியா முன்னதாக இந்த இரண்டு நபர்களையும் உள்ளடக்கிய கைதிகள் பட்டியலைப் பகிர்ந்து கொண்டது, ஆனால் அந்தப் பட்டியல் அவர்களின் மரண தண்டனை குறித்த விவரங்களை வெளிப்படுத்தவில்லை.
நீதிபதிகள் தண்டனையைத் தீர்மானிக்க விருப்பப் பேறைக் கொண்டுள்ள இஸ்லாமியச் சட்டத்தின் 'தஃசிர்' (Ta'zir) பிரிவின் கீழ் சவுதி அரேபியா இந்த மரண தண்டனைகளை நிறைவேற்றியுள்ளது.
இலங்கை அதிகாரிகளின் இராஜதந்திர மற்றும் சட்டரீதியான தலையீட்டைத் தொடர்ந்து, சமூக வலைத்தளப் பதிவு ஒன்றுக்காக இலங்கைப் பிரஜை அனோஜன் சிவராசாவிற்கு விதிக்கப்பட்ட மரண தண்டனையை சவுதி அரேபியாவின் உச்ச நீதிமன்றம் ரத்து செய்த சில நாட்களுக்குப் பிறகு இந்தச் சம்பவம் நடந்துள்ளது.
உடல்களைத் நாட்டுக்கு கொண்டு வருவது உள்ளிட்ட அடுத்த கட்ட நடவடிக்கைகள் குறித்துத் தீர்மானிப்பதற்கு முன்பு, சவுதி அரேபியிடமிருந்து விரிவான பதிலுக்காகக் காத்திருப்பதாக பங்களாதேஷ் தெரிவித்துள்ளது.
