பேரினவாத சக்திகள் நாட்டின் அதிகாரத்தைக் கைப்பற்றுவதற்கும், நீதித்துறையில் தலையிடுவதற்கும், ஜனநாயகத்தைப் பலவீனப்படுத்துவதற்கும் முயற்சிக்கும் சக்திகளுடன் ஒருபோதும் கூட்டுச் சேரக்கூடாது என பாராளுமன்ற உறுப்பினர் ரிஷாட் பதியுதீன் தெரிவித்துள்ளார்.
மன்னார் உப்புக்குளம் மற்றும் மூர்வீதி கிராம மாணவர்களின் கல்வி, விளையாட்டுச் சாதனைகளையும், மன்னார் அல்-அஸ்ஹர் தேசிய பாடசாலையின் ஆசிரியர் சமூகத்தையும் கௌரவிக்கும் நிகழ்வு மன்னார் நகர மண்டபத்தில் நடைபெற்றது.
உப்புக்குளம் மற்றும் மூர்வீதி நலன்புரி அமைப்பின் ஏற்பாட்டில் நடைபெற்ற இந்நிகழ்வில், பாராளுமன்ற உறுப்பினர் ரிஷாட் பதியுதீன் பிரதம விருந்தினராகவும், மன்னார் நகர முதல்வர் டானியல் வசந்தன் கௌரவ விருந்தினராகவும் கலந்துகொண்டனர்.
இதன்போது, குறித்த கிராமங்களைச் சேர்ந்த பல்வேறு பாடசாலைகளில் கல்வி கற்று சாதனை படைத்த மாணவர்களும், மன்னார் அல்-அஸ்ஹர் தேசிய பாடசாலை மாணவர்களும் கௌரவிக்கப்பட்டதுடன், அப்பாடசாலையின் ஆசிரியர் சமூகத்தினரும் பாராட்டப்பட்டனர்.
நிகழ்வில் உரையாற்றிய ரிஷாட் பதியுதீன், சகோதரர் அனோஜன் மரண தண்டனையிலிருந்து விடுவிக்கப்பட்ட செய்தி தமக்கு மகிழ்ச்சியளிப்பதாகக் குறிப்பிட்டார்.
எந்தவொரு மதத்தையும் நிந்திக்கவோ, மதத்தவர்களின் மனங்களைப் புண்படுத்தும் வகையில் கருத்துகளை வெளியிடவோ கூடாது என்றும் அவர் வலியுறுத்தினார்.
இஸ்லாமிய மார்க்கம் ஏனைய மதங்களையும், இனங்களையும், மதத் தலைவர்களையும் மதிக்கக் கற்றுத்தருவதாகக் குறிப்பிட்ட அவர், தமிழ் மற்றும் சிங்கள மக்களும் ஏனைய மதங்களை மதித்து, மத நல்லிணக்கத்துடன் செயற்பட வேண்டும் எனக் கேட்டுக்கொண்டார்.
நாட்டில் மீண்டும் இனவாதமும் மதவாதமும் தலைதூக்குவதற்கு இடமளிக்கக் கூடாது எனத் தெரிவித்த அவர், தமிழ், முஸ்லிம் மற்றும் மலையகக் கட்சிகள் அரசியல் நிலைப்பாடுகளைத் தாண்டி மனிதாபிமானத்தின் அடிப்படையில் ஒன்றிணைந்து செயற்பட வேண்டும் என்றும் குறிப்பிட்டார்.
மேலும், கத்தோலிக்கர்கள், இந்துக்கள், பௌத்தர்கள் மற்றும் முஸ்லிம்கள் உள்ளிட்ட அனைத்து மதத்தவர்களும் நாட்டின் பொருளாதார முன்னேற்றத்திற்கும் எதிர்கால நலனுக்கும் ஒன்றிணைய வேண்டும் எனத் தெரிவித்த ரிஷாட் பதியுதீன், இனவாதத்தையும் பேரினவாதத்தையும் தோற்கடிப்பதற்கு அனைவரும் ஒரே சக்தியாகச் செயற்பட வேண்டிய காலகட்டம் இதுவெனவும் வலியுறுத்தினார்.
