நுவரெலியா மாவட்டத்தின் டிக்கோயா நகரில் வயோதிப
தம்பதியினர் படுகொலை செய்யப்பட்ட சம்பவத்துடன் தொடர்புடைய பிரதான சந்தேகநபர், கண்டி தேசிய வைத்தியசாலையிலிருந்து தப்பிச் சென்றிருந்த நிலையில் இன்று வெள்ளிக்கிழமை (02) யாழ்ப்பாணத்தில் வைத்து பயங்கரவாதத் தடுப்புப் பிரிவினரால் கைது செய்யப்பட்டுள்ளார்.பதுளை - தெமோதரையைச் சேர்ந்த 37 வயதுடைய 'மனோஜ்' அல்லது 'மனோஹரன்' எனப்படும் நபரே இவ்வாறு கைது செய்யப்பட்டவராவார்.
முன்னதாக டிக்கோயா நகரில் இடம்பெற்ற இரட்டை கொலைச் சம்பவம் தொடர்பில் பொகவந்தலாவை பகுதியில் வைத்து பொதுமக்களின் உதவியுடன் அட்டன் மற்றும் பொகவந்தலாவை பொலிஸாரால் இவர் கைது செய்யப்பட்டிருந்தார்.
அதன்பின்னர் அட்டன் நீதவான் நீதிமன்றத்தில் ஆஜர்படுத்தப்பட்ட அவரை விளக்கமறியலில் வைக்குமாறு நீதவான் உத்தரவிட்டதையடுத்து, பல்லேகலை சிறைச்சாலையில் அடைக்கப்பட்டார்.
அங்கு அவருக்கு உடல்நலக்குறைவு ஏற்பட்டதாகத் தெரிவித்தமையினால் கண்டி தேசிய வைத்தியசாலையில் சிகிச்சைக்காக அனுமதிக்கப்பட்டிருந்த நிலையில், சிறைச்சாலை அதிகாரிகளின் பாதுகாப்பிலிருந்து தப்பிச் சென்றிருந்தார்.
அவரை மீண்டும் கைது செய்வதற்காக பொலிஸாரும் சிறைச்சாலை அதிகாரிகளும் விசேட தேடுதல் நடவடிக்கைகளை முன்னெடுத்து வந்தனர்.
மேலும் கண்டறிக
இந்நிலையில், யாழ்ப்பாணத்தில் தலைமறைவாகியிருந்த சந்தேகநபர் குறித்துக் கிடைத்தத் தகவலுக்கமைய, யாழ்ப்பாண பயங்கரவாதத் தடுப்புப் பிரிவின் பொறுப்பதிகாரி குமார்வேல் தலைமையிலான அதிகாரிகள் இன்றையதினம் நகரின் கடையொன்றுக்கு அருகில் வைத்து அவரைக் கைது செய்தனர்.
கைது செய்யப்பட்ட சந்தேகநபர் மேலதிக சட்ட நடவடிக்கைகளுக்காக யாழ்ப்பாண பொலிஸ் நிலையத்தில் ஒப்படைக்கப்பட்டுள்ளார்.
அவரிடம் விசாரணைகளை முன்னெடுத்த பின்னர், வழக்கு விசாரணைகளுக்காக நுவரெலியா பொலிஸாரிடம் ஒப்படைப்பதற்கான ஏற்பாடுகள் செய்யபட்டு வருகின்றன.
இந்த சந்தேகநபர் தப்பிச் சென்றிருந்த காலப்பகுதியில் பதுளை, ஹாலிஎல, வட்டவளை, டிக்கோயா, லிந்துலை, பொகவந்தலாவை, புலத்சிங்கள, இங்கிரிய மற்றும் பிலியந்தலை உள்ளிட்ட பல்வேறு பகுதிகளில் நடமாடியுள்ளதாகவும், இவர் பல குற்றச் செயல்களுடன் தொடர்புடையவர் எனவும் ஆரம்பக்கட்ட விசாரணைகளில் தெரியவந்துள்ளமை குறிப்பிடத்தக்கது.
