கண்டி மாவட்ட அக்குறணை பிரதேச சபையின்
அலவதுகொடை யாலுகஹவெல கழிவு முகாமைத்துவ நிலையம் மற்றும் கொம்போஸ்ட் உற்பத்தி நிலையம் முழுமையாக சுத்தம் செய்யப்பட்டு, சுற்றுச்சூழலுக்கு உகந்த வகையில் புதிய வேலைத்திட்டங்கள் தற்போது நடைமுறைப்படுத்தப்பட்டு வருகிறது. இன்று அந்த நிலையம் பழங்கள் மற்றும் காய்கறிகளினால் கொம்போஸ்ட் நிறைந்த பசுமையான நிலப்பரப்பாக மாறியுள்ளது.எதிர்காலத்தில் எமது கொம்போஸ்ட் நிலையத்தில் உற்பத்தி செய்யப்படும் இயற்கை கொம்போஸ்ட்டைப் பயன்படுத்தி, பழங்கள் மற்றும் மரக்கறிகள் பயிரிடப்படும் பசுமை விவசாயத் தோட்டத்தை உருவாக்க எதிர்பார்க்கிறோம். 🌱🍎🥬 இந்தக் கொம்போஸ்ட்டை எமது கிராமத்தைச் சேர்ந்த விவசாயிகளுக்கு வழங்கி, அதிக விளைச்சலைப் பெற்றுக்கொள்ளும் வாய்ப்பை ஏற்படுத்துவதன் மூலம், விவசாயிகள் எதிர்நோக்கும் சிரமங்களுக்கு ஒரு பாரிய தீர்வாக அமையும் என எதிர்ப்பார்கின்றோம்.
கடந்த ஜூலை மாதம் முழுவதும், களப்பணியாளர்கள் மற்றும் அக்குறணை பிரதேச சபை உறுப்பினர்களின் ஒத்துழைப்புடன், யாலுகஹவெலையில் அமைந்துள்ள கழிவு முகாமைத்துவ மற்றும் கொம்போஸ்ட் நிலையங்களை முழுமையாக சுத்தம் செய்யும் விசேட சிரமதான வேலைத்திட்டம் முன்னெடுக்கப்பட்டது.
மேலும், கழிவு சேகரிப்பு சேவையை நிர்ணயிக்கப்பட்ட கால அட்டவணைக்கு அமைவாக முறையாக முன்னெடுப்பதற்கான நடவடிக்கைகளும் தற்போது மேற்கொள்ளப்பட்டு வருகின்றன.
♻️ கழிவிலிருந்து வருமானம் !
மக்காத கழிவுகளை மறுசுழற்சி செய்து அதிக வருமானத்தை உருவாக்கும் நோக்கில் Baler Machine ஒன்றை கொள்வனவு செய்ய நடவடிக்கை எடுக்கப்பட்டு வருகிறது. இதன் மூலம் மக்காத கழிவுகளை முறையாக அழுத்தி, சேமித்து, பின்னர் ஒழுங்குமுறையாக விற்பனை செய்து மறுசுழற்சிக்கு அனுப்ப முடியும்.
அதேபோல், பிரதான வீதிகளுக்கு மேலதிகமாக அதிகளவிலான உள்வீதிகளுக்கும் கழிவு சேகரிப்பு சேவையை வழங்குவதற்காக புதிய கழிவு சேகரிப்பு முச்சக்கர வண்டிகளை கொள்வனவு செய்யவும் எதிர்பார்க்கப்படுகிறது. 🛺♻️
கடந்த சில மாதங்களாக திட்வா பேரிடரினால் சேதமடைந்த இடங்களை புனரமைத்தல், முன்னெடுக்கப்பட்ட அபிவிருத்திப் பணிகள், கடுமையான நிதி நெருக்கடி, மட்டுப்படுத்தப்பட்ட வளங்கள் மற்றும் குறைந்த மனித வளம் போன்ற பல சவால்களை எதிர்கொள்ள வேண்டியிருந்தது. இதன் காரணமாக கழிவு முகாமைத்துவத்திற்காக நடைமுறைப்படுத்தப்பட வேண்டிய சில திட்டங்கள் தாமதமடைந்திருந்த போதிலும், தற்போது அந்த புதிய மற்றும் நவீன வேலைத்திட்டத்தை மீண்டும் நடைமுறைப்படுத்த முடிந்துள்ளது.
🏆 40 ஆண்டுகால கழிவுப் பிரச்சினைக்கு தீர்வு :-
அக்குறணை பிராந்தியத்தில் சுமார் 40 ஆண்டுகளாக நிலவிய கழிவுப் பிரச்சினைக்கு, 2018ஆம் ஆண்டு ஆரம்பிக்கப்பட்ட திட்டமிட்ட வேலைத்திட்டத்தின் மூலம் சுமார் ஒன்றரை வருட காலத்திற்குள் குறிப்பிடத்தக்க தீர்வை வழங்க முடிந்தது.
ரூ. 150 மில்லியனுக்கும் அதிகமான பெறுமதியுடைய பாரிய கழிவு முகாமைத்துவத் திட்டத்தின் கீழ், கழிவுப் பிரச்சினைக்கு நிலையான தீர்வை வழங்கி, முறையான கழிவு முகாமைத்துவக் கட்டமைப்பை உருவாக்க முடிந்தது.
✅ மக்காத கழிவுகளை சுற்றுச்சூழலுக்கு பாதிப்பு ஏற்படாத வகையில், மத்திய சுற்றாடல் அதிகார சபையின் பரிந்துரைகளுக்கு அமைவாக அகற்றுவதற்கான கழிவு எரிப்பான் அமைத்தல்.
✅ கொம்போஸ்ட் உற்பத்தி நிலையத்தை அபிவிருத்தி செய்தல் மற்றும் சுற்றுச்சூழல் அலுவலகக் கட்டமைப்புகளை உருவாக்குதல்.
✅ யாலுகஹவெல கழிவு நிலையத்தின் உள்வீதிகளை புனரமைத்தல்.
✅ முறையான கழிவு சேகரிப்பு முறையை உருவாக்குதல்.
✅ சுற்றுச்சூழலுக்கு நட்பான மற்றும் நிலையான கழிவு முகாமைத்துவ முறையை உருவாக்குதல்.
✅ கொம்போஸ்ட் நிலையத்தை நிறுவி, கொம்போஸ்ட் உற்பத்தி செயல்முறையை முன்னெடுத்தல்.
🍼 பாம்பர்ஸ், டயப்பர்கள் மற்றும் ஏனைய விசேட கழிவுகளை தனியாக சேகரிக்கும் முறையான வேலைத்திட்டத்தை எதிர்காலத்தில் ஆரம்பித்து, அவற்றை மறுசுழற்சி செய்வதன் மூலம் பிரதேச சபைக்கு புதிய வருமான வழிகளை உருவாக்குவதுடன், இளைஞர்கள் மற்றும் பெண்களுக்கு புதிய தொழில் வாய்ப்புகளை உருவாக்குதல்.
📚 மக்கள் விழிப்புணர்வு நிகழ்ச்சிகள், சுற்றுச்சூழல் கல்வி முகாம்கள் மற்றும் சமூகப் பங்கேற்பு நிகழ்ச்சிகளை மேலும் விரிவுபடுத்துதல்.
இதுபோன்ற பல்வேறு சேவைகளை எமது பிரதேச சபையினால் தற்போது ஆரம்பித்திருக்கின்றோம்.
எதிர்காலத்தில் அக்குறணை பிரதேச சபையை இலங்கையின் முன்னுதாரணமான, சுற்றுச்சூழலுக்கு நட்பான, வருமானத்தை உருவாக்கும் மற்றும் நிலையான கழிவு முகாமைத்துவக் கட்டமைப்பைக் கொண்ட உள்ளூராட்சி நிறுவனமாக மீண்டும் உருவாக்குவதே எமது இலக்காகும்.
இந்தப் பயணத்தை வெற்றிகரமாக முன்னெடுப்பது பிரதேச சபையினால் மாத்திரம் சாத்தியமில்லை. கழிவுகளை முறையாகப் பிரித்தல், நிர்ணயிக்கப்பட்ட நேரத்தில் கழிவுகளை ஒப்படைத்தல், மறுசுழற்சிக்கு சட்டபூர்வமான முறையில் ஒத்துழைத்தல் மற்றும் சுற்றுச்சூழலைப் பாதுகாத்தல் ஆகியவற்றில் ஒவ்வொரு குடிமகனின் ஒத்துழைப்பும் அத்தியாவசியமாகும்.
இஸ்திஹார் இமாதுதீன்
தவிசாளர் - அக்குறணை பிரதேச சபை
