Our Feeds


Thursday, November 19, 2026

SHAHNI RAMEES

மாகாண மட்ட பேச்சுப் போட்டியில் முதலிடம்! - கொட்டாஞ்சேனை கலாநிதி பதியுத்தீன் மஹ்மூத் கல்லூரியின் வரலாற்றில் புதிய மைல்கல்!



கொட்டாஞ்சேனை கலாநிதி பதியுத்தீன் மஹ்மூத்

Zameera

ஒழுங்கமைக்கப்பட்ட குற்றக் கும்பல் தலைவன் 'பஸ் லலித்' டிசம்பர் 04 வரை விளக்கமறியலில்!

 

ஒழுங்கமைக்கப்பட்ட குற்றக் கும்பல் தலைவனான லலித் கன்னங்கர எனப்படும் 'பஸ் லலித்' என்பவரை எதிர்வரும் டிசம்பர் மாதம் 04 ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டுள்ளது.


சந்தேகநபர் இன்று வியாழக்கிழமை (19) பிற்பகல் அவிசாவளை நீதவான் பிரமோத்ய ஜயசேகர முன்னிலையில் ஆஜர்படுத்தப்பட்டதைத் தொடர்ந்து, நீதவானினால் இந்த உத்தரவு பிறப்பிக்கப்பட்டுள்ளது.

ShortNews

எயார்பஸ் ஊழல் வழக்கில் நாமலுக்கு பிணை மறுப்பு - டிசம்பர் 2ஆம் திகதி வரை விளக்கமறியல்!


இலங்கை பொதுஜன பெரமுனவின் (SLPP) நாடாளுமன்ற உறுப்பினர் நாமல் ராஜபக்ஷவை எதிர்வரும் டிசம்பர் 2ஆம் திகதி வரை தொடர்ந்தும் விளக்கமறியலில் வைக்க கொழும்பு நிரந்தர மேல் நீதிமன்றத்தின் மூவரடங்கிய நீதிபதிகள் குழாம் உத்தரவிட்டுள்ளது.

ஸ்ரீலங்கன் எயார்லைன்ஸ் நிறுவனத்துடன் தொடர்புடையதாகக் கூறப்படும் எயார்பஸ் விமானக் கொள்வனவு ஊழல் விவகாரத்தில், நாடாளுமன்ற உறுப்பினர் நாமல் ராஜபக்ஷவுக்கு எதிரான குற்றப்பத்திரிகைகள் உத்தியோகபூர்வமாகக் கையளிக்கப்பட்டதைத் தொடர்ந்து இந்த உத்தரவு பிறப்பிக்கப்பட்டுள்ளது.

சர்ச்சைக்குரிய எயார்பஸ் விமானக் கொடுக்கல் வாங்கலுடன் தொடர்புடையதாகக் கூறப்படும் 100 மில்லியன் ரூபா இலஞ்சத்தைப் பெற்றுக்கொண்டமை மற்றும் பணமோசடி செய்தமை ஆகிய குற்றச்சாட்டுகள் தொடர்பிலேயே இந்த வழக்கு விசாரணை நடைபெற்று வருகின்றமை குறிப்பிடத்தக்கது.

SHAHNI RAMEES

ரோஹிங்கியா முஸ்லிம்களின் இனப்படுகொலைக்கு மியான்மரே பொறுப்பு! - சர்வதேச நீதிமன்றம்

 

2017-ஆம் ஆண்டு ரோஹிங்கியா முஸ்லிம்களுக்கு எதிராக
ShortNews

அரச பொறியியலாளர்களுக்கான போக்குவரத்துக் கொடுப்பனவை 75,000 ரூபாவாக அதிகரிக்கவும் - சஜித் கோரிக்கை!


அரச துறையில் பணியாற்றும் பொறியியலாளர்களுக்கான களப்பணி மற்றும் போக்குவரத்துக் கொடுப்பனவை (Field Attendance and Transport – FAT Allowance) மீண்டும் வழங்குவதுடன், அதனை 25,000 ரூபாவிலிருந்து 75,000 ரூபாவாக அதிகரிக்க வேண்டும் என எதிர்க்கட்சித் தலைவர் சஜித் பிரேமதாச அரசாங்கத்திடம் கோரிக்கை விடுத்துள்ளார்.


இன்று (19) நாடாளுமன்றத்தில் நிலையியற் கட்டளை 27(2) இன் கீழ் கேள்விகளை எழுப்பிய சஜித் பிரேமதாச, அரச பொறியியலாளர்களுக்கு வழங்கப்பட்டு வந்த இக்கொடுப்பனவு, கடந்த அரசாங்கத்தினால் 2024 ஜூலை 1ஆம் திகதி முதல் இடைநிறுத்தப்பட்டதாகத் தெரிவித்தார்.


வாழ்க்கைச் செலவு அதிகரிப்பு மற்றும் களப்பணிகளுடன் தொடர்புடைய செலவுகளைக் கருத்தில் கொண்டு, முந்தைய அரசாங்கத்தின் அணுகுமுறையைப் பின்பற்றாமல், திருத்தப்பட்ட கொடுப்பனவுத் தொகையுடன் இதனை மீண்டும் வழங்குவதற்கு தற்போதைய அரசாங்கம் நடவடிக்கை எடுக்க வேண்டும் என்றும் அவர் வலியுறுத்தினார்.


களப்பணிகளை முன்னெடுக்கும்போது போக்குவரத்துச் சிரமங்கள், சுகாதாரம் மற்றும் பாதுகாப்பு தொடர்பான அபாயங்கள், இயற்கை அனர்த்தங்கள் மற்றும் அவசரகாலச் சூழ்நிலைகள் உள்ளிட்ட பல்வேறு சவால்களை அரச பொறியியலாளர்கள் எதிர்கொள்வதாகவும் அவர் சுட்டிக்காட்டினார்.


2024 ஜூன் 27ஆம் திகதியிடப்பட்ட 18/2015-5 இலக்க சுற்றறிக்கையின் கீழ் இக்கொடுப்பனவை இடைநிறுத்துவதற்கு முன்னர், போக்குவரத்துச் செலவுகள் தொடர்பில் அரசாங்கம் முறையான மதிப்பீட்டை மேற்கொண்டதா என்றும் அவர் கேள்வி எழுப்பினார்.


மேலும், அரச துறையில் பணியாற்றும் பொறியியலாளர்களுக்கு வழங்கப்படும் சம்பளம் குறித்தும் எதிர்க்கட்சித் தலைவர் கவலை வெளியிட்டார்.


ஒரு பொறியியலாளருக்கு சுமார் 106,000 ரூபாவே சம்பளமாக வழங்கப்படுவதாகக் குறிப்பிட்ட அவர், இதன் காரணமாகத் திறமையான தொழில்சார் நிபுணர்கள் நாட்டை விட்டு வெளியேறுவது ஆச்சரியமான விடயமல்ல என்றும் தெரிவித்தார்.


பொறியியலாளர்கள் தொடர்ச்சியாக நாட்டை விட்டு வெளியேறுவது, தேசிய அபிவிருத்தி மற்றும் உட்கட்டமைப்புத் திட்டங்களை நடைமுறைப்படுத்துவதற்கான அரச துறையின் ஆற்றலைப் பலவீனப்படுத்துவதாகவும் அவர் எச்சரித்தார்.


அரச பொறியியல் துறையில் நிலவும் வெற்றிடங்கள் காரணமாக, தனியார் மற்றும் வெளிநாட்டு ஆலோசனை நிறுவனங்களின் சேவைகளில் அரசாங்கம் அதிகளவில் தங்கியிருப்பது குறித்தும் அவர் கேள்வி எழுப்பினார்.


கடந்த ஐந்து ஆண்டுகளில் இவ்வாறான ஆலோசனைச் சேவைகளுக்காகச் செலவிடப்பட்ட தொகை குறித்த விபரங்களைக் கோரிய அவர், அரச பொறியியல் சேவையை வலுப்படுத்துவது செலவுகளைக் குறைக்கும் நடவடிக்கையாக அமையுமா என்றும் வினவினார்.


பொறியியலாளர்களைத் தக்கவைத்தல், நிலவும் வெற்றிடங்களை நிரப்புதல் மற்றும் வெளிநாடுகளில் பணியாற்றும் இலங்கைப் பொறியியல் நிபுணர்களை மீண்டும் ஈர்த்தல் ஆகியவற்றை உள்ளடக்கிய விரிவான வேலைத்திட்டமொன்றை அரசாங்கம் அறிமுகப்படுத்த வேண்டும் என்றும் எதிர்க்கட்சித் தலைவர் கோரிக்கை விடுத்தார்.


அபிவிருத்தித் திட்டங்களுக்காகப் பெருமளவு நிதி ஒதுக்கீடு செய்யப்பட்டாலும், அவற்றை நடைமுறைப்படுத்துவதற்குப் போதுமான தகைமையுள்ள பொறியியலாளர்கள் இல்லாவிட்டால் அந்த நிதி ஒதுக்கீடுகளால் எவ்வித பயனும் ஏற்படாது என்றும் அவர் வலியுறுத்தினார்.

Zameera

காற்று மாசு காரணமாக யாழ்ப்பாணம் – சென்னை விமான சேவைகள் இரத்து!

 

யாழ்ப்பாணத்தில் நிலவும் கடுமையான காற்று மாசு உள்ளிட்ட காரணங்களால், யாழ்ப்பாணம் – சென்னை இடையிலான விமான சேவைகள் இன்று (19) இரத்து செய்யப்பட்டுள்ளன.



காற்று மாசுபாடு அதிகரித்ததன் விளைவாக, யாழ்ப்பாணம் சர்வதேச விமான நிலையப் பகுதியில் விமானங்கள் தரையிறங்குவதற்கும் புறப்படுவதற்கும் போதிய பார்வைத் தெளிவு  இல்லாத நிலை ஏற்பட்டுள்ளது.



இதன் காரணமாகவே சென்னை – யாழ்ப்பாணம் இடையிலான விமானப் பயணங்கள் இன்று முன்னெடுக்கப்படவில்லை என அதிகாரிகள் தெரிவிக்கின்றனர்.



இதேவேளை, யாழ்ப்பாணத்தில் காற்றின் தரச் சுட்டெண் 200 என்ற எல்லையைக் கடந்து "மிகவும் ஆரோக்கியமற்ற" நிலையை எட்டியுள்ளதாக மத்திய சுற்றாடல் அதிகார சபை (CEA) முன்னதாக வெளியிட்ட அறிக்கையில் தெரிவிக்கப்பட்டிருந்தது.



வங்காள விரிகுடாவில் உருவாகியுள்ள 'அக்வான்' புயலின் தாக்கத்தால் காற்றின் திசையில் ஏற்பட்டுள்ள மாற்றம் மற்றும் எல்லை கடந்து வீசும் மாசடைந்த காற்று ஆகியவற்றாலேயே, யாழ்ப்பாணம் உட்பட நாட்டின் பல பகுதிகளிலும் காற்றின் தரம் இவ்வாறு வீழ்ச்சியடைந்துள்ளதாக அந்த அறிக்கையில் மேலும் சுட்டிக்காட்டப்பட்டுள்ளது.


Zameera

உள்நாட்டு இறைவரித் திணைக்களத் தலைமையகத்தில் தீ விபத்து!

 

கொழும்பில் அமைந்துள்ள உள்நாட்டு இறைவரித் திணைக்களத்தின் தலைமையகக் கட்டடத்தில் தீ விபத்து ஏற்பட்டுள்ளது.




தீயைக் கட்டுப்பாட்டுக்குள் கொண்டு வருவதற்காக இரண்டு தீயணைப்பு வாகனங்கள் சம்பவ இடத்திற்கு அனுப்பி வைக்கப்பட்டுள்ளதாக தீயணைப்புப் பிரிவு தெரிவித்துள்ளது.




தீ விபத்துக்கான காரணம் மற்றும் சேத விபரங்கள் தொடர்பான தகவல்கள் இதுவரை வெளியாகவில்லை.




எவ்வாறாயினும் கொழும்பில் அமைந்துள்ள உள்நாட்டு இறைவரித் திணைக்களத்தின் தலைமையகக் கட்டடத்தில் ஏற்பட்ட தீ விபத்து தற்போது முழுமையாகக் கட்டுப்பாட்டுக்குள் கொண்டு வரப்பட்டுள்ளதாக உள்நாட்டு இறைவரித் திணைக்களம் தற்போது தெரிவித்துள்ளது.


ShortNews

வாகன இலக்கத் தகடுகளை பெறாதவர்களுக்கு - புதிய காலக்கெடுவை அறிவித்தது மோட்டார் போக்குவரத்துத் திணைக்களம்!


வாகன இலக்கத் தகடுகள் மற்றும் சாரதி அனுமதிப்பத்திரங்களை விநியோகிப்பதில் நிலவும் தாமதங்களை 2027ஆம் ஆண்டு ஆகஸ்ட் மாதத்திற்குள் முழுமையாக நிவர்த்தி செய்ய எதிர்பார்ப்பதாக மோட்டார் போக்குவரத்துத் திணைக்களம் (DMT) நாடாளுமன்றத்திற்குத் தெரிவித்துள்ளது.

உட்கட்டமைப்பு மற்றும் மூலோபாய அபிவிருத்தி தொடர்பான துறைசார் மேற்பார்வைக் குழுவின் அண்மைய கூட்டத்தில் திணைக்கள அதிகாரிகள் இதனைத் தெரிவித்துள்ளனர். ஐக்கிய மக்கள் சக்தியின் நாடாளுமன்ற உறுப்பினர் எஸ்.எம். மரிக்கார் தலைமையில் இக்கூட்டம் நடைபெற்றது.

இதன்போது, திணைக்களத்தினால் வழங்கப்பட்டுள்ள காலக்கெடு தொடர்பில் நாடாளுமன்ற உறுப்பினர் மரிக்கார் கேள்வி எழுப்பினார்.

முந்தைய கூட்டத்தில் கலந்துரையாடப்பட்ட காலக்கெடுவுடன் ஒப்பிடுகையில், தற்போது காலக்கெடு மேலும் நீடிக்கப்பட்டுள்ளதாகத் தோன்றுவதாகவும் அவர் சுட்டிக்காட்டினார்.

எனினும், நிலுவையில் உள்ள பணிகளை நிறைவு செய்வதற்கான எதிர்பார்க்கப்படும் காலக்கெடுவாக 2027ஆம் ஆண்டு ஜூலை அல்லது ஆகஸ்ட் மாதத்தையே தாம் ஏற்கனவே குறிப்பிட்டிருந்ததாக மோட்டார் போக்குவரத்துத் திணைக்கள அதிகாரிகள் தெரிவித்துள்ளனர்.

ShortNews

இலங்கை மின்சார சபையில் ஏற்பட்ட நட்டம்!


இலங்கை மின்சார சபை 2025 ஆம் ஆண்டின் 38,739 மில்லியன் ரூபா நிகர நட்டமடைந்துள்ளதாக துறைமுகங்கள் மற்றும் சிவில் விமான சேவைகள் அமைச்சர் மற்றும் வலுசக்தி அமைச்சர் அனுர கருணாதிலக்க இன்று (19.11.2026) பாராளுமன்றத்தில் உரையாற்றும் போது குறிப்பிட்டார்.

பாராளுமன்ற உறுப்பினர் தயாசிறி ஜயசேக்கர கேட்ட வினாவுக்கு பதிலளிக்கும் போதே இதனை குறிப்பிட்டார்.மின்சார சபை தொடர்பில் மேலும் உரையாற்றிய அவர்

2025 டிசம்பர் 31 உடன் முடிவடையும் நிதியாண்டிற்கான மொத்த வருமானம் 4,22,506 மில்லியன் ரூபாவாகும்.

2024 இல் மொத்த இலாபம் 141,604 மில்லியன் ரூபாயாகும்; 2023 இல் 57,632 மில்லியன் ரூபாயாகும்.

பொதுவாகக் கட்டணக் குறைப்பு காரணமாக வருமானத்தில் கடுமையான வீழ்ச்சி ஏற்பட்டது.

முந்தைய ஆண்டுடன் ஒப்பிடுகையில் ஏனைய வருமானங்களில் குறைவு. அதேபோல 2025 ஆம் ஆண்டில் ஏற்பட்ட நட்டத்திற்குப் பிரதான காரணங்களாக:

மின்சார விற்பனை அளவு அதிகரிப்பு மற்றும் நிதிச் செலவு குறைவு ஆகியவற்றுக்கு மத்தியில் குறைக்கப்பட்ட கட்டண முறை மின்சார கொள்முதல் செலவு அதிகரிப்பு மற்றும் கூரைகளில் பொருத்தப்பட்ட சூரிய சக்தி அமைப்புகளுக்கு செலுத்தப்படும் தொகை அதிகரிக்கப்பட்டமை போன்ற சூழ்நிலைகளால் இந்த நட்டம் ஏற்பட்டுள்ளது.

2025 மற்றும் 2024 ஆம் ஆண்டுகளில் திறைசேரியினால் எவ்விதத் தொகையும் வழங்கப்படவில்லை. 

ஆனால் 2023 ஆம் ஆண்டில் 277 மில்லியன் வழங்கப்பட்டுள்ளது. இது உண்மையில் இலங்கை பெற்றோலியக் கூட்டுத்தாபனத்திற்குச் செலுத்த வேண்டிய கொடுப்பனவுகளுக்காக மேலதிக பங்கு முதலீடாக வழங்கப்பட்டுள்ளது.

Zameera

சாதாரண தரப் பரீட்சை டிசம்பர் 8ஆம் திகதி ஆரம்பம்

 


2026ஆம் ஆண்டுக்கான கல்விப் பொதுத் தராதர சாதாரண தரப் பரீட்சை டிசம்பர் 8ஆம் திகதி முதல் 17ஆம் திகதி வரை நடைபெறவுள்ளதாகப் பரீட்சைகள் திணைக்களம் அறிவித்துள்ளது.




பரீட்சை அனுமதி அட்டைகளில் ஏதேனும் திருத்தங்கள் மேற்கொள்ள வேண்டியிருப்பின், எதிர்வரும் நவம்பர் 30ஆம் திகதி நள்ளிரவுக்கு முன்னர் பரீட்சைகள் திணைக்களத்தின் உத்தியோகபூர்வ இணையத்தளத்தின் ஊடாக அவற்றை மேற்கொள்ள வேண்டும் என அறிவுறுத்தப்பட்டுள்ளது.




பரீட்சை நிறைவடைந்த பின்னர் அனுமதி அட்டைகளில் திருத்தங்களை மேற்கொள்வதற்கு எந்தவொரு சந்தர்ப்பமும் வழங்கப்படமாட்டாது எனவும் பரீட்சைகள் திணைக்களம் தெரிவித்துள்ளது.

Zameera

அரச நிறைவேற்று அதிகாரிகள் நாளை பணிப்புறக்கணிப்பில்

 


2027ஆம் ஆண்டுக்கான வரவு செலவுத் திட்ட முன்மொழிவுகளுக்கு எதிர்ப்புத் தெரிவித்து, அரச நிறைவேற்று அதிகாரிகள் நாளை (20) நாடளாவிய ரீதியில் ஒருநாள் அடையாளப் பணிப்புறக்கணிப்பில் ஈடுபடவுள்ளனர். 


அரச நிறைவேற்று அதிகாரிகள் கூட்டுக் குழுவைப் பிரதிநிதித்துவப்படுத்தும் 20 தொழிற்சங்கங்கள் இணைந்து இந்தப் பணிப்புறக்கணிப்பை முன்னெடுக்கவுள்ளன. 


நிறைவேற்றுச் சேவைகளில் தெரிவுசெய்யப்பட்ட சில துறைகளுக்கு மாத்திரம் கொடுப்பனவுகள் அதிகரிக்கப்பட்டுள்ளதாகக் குறித்த குழு குற்றஞ்சாட்டியுள்ளது.

SHAHNI RAMEES

இலஞ்சம் பெற்ற குற்றச்சாட்டில் கைது செய்யப்பட்ட கொழும்பு வடக்கு காதி நீதிபதியும் அவரது மனைவியும் டிசம்பர் 1ஆம் திகதி வரை விளக்கமறியலில்...

 



இலஞ்சம் பெற்ற குற்றச்சாட்டில் கைது செய்யப்பட்ட

ShortNews

கொளத்தூர் தொகுதி த.வெ.க எம்எல்ஏ வி.எஸ்.பாபு காலமானார்!


கொளத்தூர் தொகுதி தவெக எம்.எல்.ஏ, வி.எஸ்.பாபு உடல்நலக் குறைவால் இன்று (19) பிற்பகல் மருத்துவமனையில் காலமானார்.

வி.எஸ்.பாபு சட்டசபை தேர்தலில் முன்னாள் முதல்வர் ஸ்டாலினை தோற்கடித்ததால் தமிழகம் முழுவதும் அறியப்பட்டார்.

உடல்நலக் குறைவால் செப்டம்பர் 9 ஆம் திகதி சென்னை அம்பத்தூரில் உள்ள மருத்துவமனையில் அனுமதிக்கப்பட்டார். அவரது உடல்நிலை குறித்து அவ்வபோது அறிக்கை வெளியிடப்பட்டன. முதல்வர் விஜய், அமைச்சர்கள் நேரில் சென்று நலம் விசாரித்தனர்.

இந்நிலையில் வி.எஸ்.பாபு இன்று(19) பிற்பகல் சிகிச்சை பலனின்றி மருத்துவமனையில் காலமானார்.

2006 முதல் 2011 வரை திமுக எம்.எல்.ஏ ஆக இருந்துள்ளார். 2011 வரை வட சென்னை மாவட்ட திமுக செயலாளர் பதவி வகித்துள்ளார். கொளத்தூர் தொகுதியில் ஸ்டாலினுக்காக பணியாற்றினார். திமுகவில் இருந்து நீக்கப்பட்டதை தொடர்ந்து 2016 இல் அதிமுகவில் இணைந்தார்.

2026 பெப்ரவரி 7 இல் தவெகவில் இணைந்து கொளத்தூர் தொகுதியில் ஸ்டாலினை எதிர்த்து போட்டியிட்டு, 8,795 ஓட்டு வித்தியாசத்தில் வெற்றி பெற்றார்.

ShortNews

கல்முனை, சாய்ந்தமருது சபைகளுக்கான தேர்தலுக்கு தயார் - நிசாம் காரியப்பர் சவால்!


கல்முனை மாநகர சபை - சாய்ந்தமருது நகரசபை தொடர்பில்  எல்லை நிர்ணய குழு ஒன்று தற்போது நியமிக்கப்பட்டுள்ளது. இரண்டு மாத காலத்துக்குள் எல்லை நிர்ணய  பணிகளை நிறைவு செய்ய வேண்டும் என்று உயர்நிதிமன்றம் உத்தரவிட்டுள்ளது. ஆனால் வெளியிடப்பட்டுள்ள வர்த்தமானி அறிவித்தலில் எவ்வித காலவரையறையும் குறிப்பிடப்படவில்லை. இதுபாரியதொரு குறைப்பாடாகும். கல்முனை மாநகர சபை மற்றும் சாந்தமருது நகர சபை தேர்தலுக்கு நாங்கள் தயார், அரசாங்கம் தயாரா என  ஸ்ரீ லங்கா முஸ்லிம் காங்கிரசின் செயலாளர் நாயகமும், பாராளுமன்ற உறுப்பினருமான நிசாம் காரியப்பர் சவால் விடுத்தார்.

பாராளுமன்றத்தில் இடம்பெற்ற 2027 ஆம் ஆண்டுக்கான வரவு செலவுத் திட்டத்தின் ஐந்தாம் நாள்  விவாதத்தில் உரையாற்றுகையில் மேற்கண்டவாறு குறிப்பிட்டார்.

அங்கு அவர் மேலும் உரையாற்றுகையில்,

வரவு செலவுத் திட்ட முன்மொழிவானது மீண்டும் சர்வதேச நாணய நிதியத்திடம் சரணாகதியாகின்ற அமெரிக்க ஜனாதிபதி டிரம்பின் ஏகாதிபத்திய வெளிநாட்டு கொள்கைகளின் அழுத்தங்களுக்கு அடிபணிவது மட்டுமன்றி மத்திய கிழக்கில் நீண்ட காலமாக இலங்கைக்கு உதவி வந்த ஈரான் போன்ற நட்பு நாடுகளின் நலன்களை புறக்கணிக்கும் நிலைக்கு தள்ளப்படுகின்றோம் என்பதனை மறந்துவிடக் கூடாது.

அமெரிக்காவின் அரசியல் மற்றும் இராஜதந்திர அழுத்தங்களுக்கு அடிபணிந்து இஸ்ரேலின் சியோனிச அரசியல் மற்றும் இராணுவ நோக்கத்திற்கு சாதமான நிலைப்பாட்டை இலங்கை எடுக்குமாக இருந்தால் அது எமது நீண்டகால அணிசேரா கொள்கை மற்றும் சுயாதீன வெளிநாட்டு கொள்கைக்கும் முரணாக அமையும். அத்துடன் இத்தகைய நிலைப்பாடு அண்டைய நாடான இந்தியாவுடனான பிராந்திய தொடர்புகளுக்கும் தேவையற்ற சிக்கல்களை ஏற்படுத்தும் என்பதனையும் நினைவில் கொள்ளுங்கள். இலங்கையின் பொருளாதார வர்த்தகத்தையும் பாதிக்கும். பல துறைகளில் இதன் தாக்கம் ஏற்படுத்தலாம்.

இந்த பாவச் செயலுக்கு நாமும் பங்காளிகள் ஆகின்றோம். ஒரு வல்லரசின் இராணுவ நிகழ்ச்சி நிரலுக்கு இலங்கை துணை போவது சர்வதேச சட்டங்களுக்கும் முரணான இராணுவ நடவடிக்கைக்கு இலங்கை நேரடியாகவோ மறைமுகமாகவோ உதவும் என்பதுடன், சர்வதேச சட்ட பொறுப்பு கூறலுக்கும் கேள்விகளுக்கு நாங்கள் உள்ளாகலாம். எனவே இலங்கை எந்தவொரு வல்லரசுக்கும் அடிபணியாமல் வெளிநாட்டு கொள்கை, சர்வதேச சட்ட கோட்பாடுகளுக்குள் பாதுகாக்கப்பட வேண்டும்.

கல்முனை நகரில் காணப்படும் அடிப்படைப் பிரச்சினைகளுக்குத் தீர்வு காணக் குறைந்தபட்சம் 65,000 மில்லியன் ரூபாய் ஒதுக்கப்பட வேண்டும். ஆனால், 2027 ஆம் ஆண்டுக்கான வரவு செலவுத் திட்டத்தில் '15 நகரங்கள் அபிவிருத்தித் திட்டத்தின்' கீழ் கல்முனைப் பகுதிக்கு வெறும் 5,000 மில்லியன் ரூபாய் மட்டுமே நிதி ஒதுக்கப்பட்டுள்ளது. கல்முனை மக்களுக்கு இது பாரியதொரு அநீதியாகும். அரசாங்கத்தின் மீதான முஸ்லிம் மக்களின் நம்பிக்கை முற்றாகச் சிதைந்துவிட்டது. இது பற்றி அரசாங்கத்திற்கு எவ்வித கவலையும் கிடையாது. ஆனால், இதன் உண்மையான பிரதிபலனை அரசாங்கம் வெகு விரைவில் எதிர்கொள்ள நேரிடும்.

வெகு விரைவில் கல்முனை மாநகர சபை மற்றும் சாய்ந்தமருது நகர சபைக்கான தேர்தல்கள் இடம்பெறவுள்ளன. அதற்கு நாங்கள் தயாராக உள்ளோம், அரசாங்கம் தயாராக உள்ளதா? சாய்ந்தமருது நகர சபை தொடர்பில் அரசாங்கம் என்ன செய்துள்ளது என்பதைப் பற்றி ஆராய வேண்டும். 2026 ஆம் ஆண்டுக்கான வர்த்தமானியின் பிரகாரம் அறிவிக்கப்பட்ட சாய்ந்தமருது நகரசபை தற்போது சட்ட ரீதியாக உயர் நீதிமன்றத்தால் உறுதிப்படுத்தப்பட்டுள்ளது.

உயர் நீதிமன்றத் தீர்ப்பு வெளியாகிச் சுமார் ஆறு மாதங்கள் கடந்ததன் பின்னர், பொதுநிர்வாக அமைச்சு அது தொடர்பில் மூன்று வர்த்தமானி அறிவித்தல்களை வெளியிட்டுள்ளது. அதன் அடிப்படையில் புதிதாக எல்லை நிர்ணயக் குழு ஒன்று நியமிக்கப்பட்டுள்ளது. இதனைச் செய்ய வேண்டும் என்று உயர் நீதிமன்றம் கடந்த மார்ச் மாதமே அறிவித்திருந்தது. தற்போது வர்த்தமானி ஒன்று பிரசுரிக்கப்பட்டுள்ள போதிலும்,அதில் பாரிய ஒரு தவறு இடம்பெற்றுள்ளது. சுமார் இரண்டு மாதங்களுக்குள் எல்லை நிர்ணய நடவடிக்கை நிறைவேற வேண்டும் என்று உயர் நீதிமன்றம் குறிப்பிட்டுள்ளது. ஆனால், வர்த்தமானியில் அவ்வாறான கால வரையறைகள் எதுவும் குறிப்பிடப்படவில்லை.

உயர்நீதிமன்ற  உத்தரவுக்கு அமைய, எதிர்வரும் ஜனவரி மாதம் எல்லை நிர்ணயக் குழு தனது அறிக்கையைச் சமர்ப்பிக்க வேண்டும். அதன் பின்னர், சாய்ந்தமருது நகர சபைக்கான தேர்தலை நடத்த வேண்டும். ஆனால், அரசாங்கம் இதற்கு எந்த அளவில் தயாராக உள்ளது? சாய்ந்தமருதில் புதிதாக உருவாக்கப்பட வேண்டிய நகர சபைக்கு அரசாங்கம் இதுவரை என்ன நடவடிக்கைகளை முன்னெடுத்துள்ளது என்பதைக் கேள்விக்குட்படுத்த வேண்டியுள்ளது. ஆகவே, தேர்தல் ஒன்று இடம்பெற்றால் மட்டுமே அரசாங்கத்தின் உண்மையான நிலை என்ன என்பதைத் தெரிந்து கொள்ள முடியும். நாங்கள் கல்முனை மாநகர சபை மற்றும் சாய்ந்தமருது நகர சபைத் தேர்தல்களுக்குத் தயாராக உள்ளோம், அரசாங்கம் தயாராக உள்ளதா? தேர்தலை நடத்தினால் அரசாங்கத்தின்  நிலை எதுவென்பதை தெரிந்துக் கொள்ளலாம் என்றார்.

ShortNews

மட்டக்களப்பில் ஈ.பி.டி.பி உறுப்பினர்கள் 8 பேருக்கு மரண தண்டனை!


ஏறாவூர் பொலிஸ் பிரிவுக்குட்பட்ட பகுதியைச் சேர்ந்த ஒருவரை கடத்திக் கொலை செய்த சம்பவம் தொடர்பான வழக்கில், 8 பேருக்கு மரண தண்டனை விதித்த மட்டக்களப்பு மேல் நீதிமன்றம் , 9ஆவது பிரதிவாதியை வழக்கில் இருந்து விடுதலை செய்துள்ளது.

மட்டக்களப்பு மேல் நீதிமன்ற நீதிபதி ரி.ஜே. பிரபாகரன் இன்று (19) வியாழக்கிழமை இந்தத் தீர்ப்பை வழங்கினார்.

கடந்த 2008ஆம் ஆண்டு ஜூன் மாதம் 19ஆம் திகதி, ஏறாவூர் பகுதியைச் சேர்ந்த தேவதாஸ் சுரேஷ்குமார் என்பவரை அப்போதைய செங்கலடி முகாமில் இருந்த ஈழ மக்கள் ஜனநாயக கட்சியை (EPDP) சேர்ந்தவர்கள் வானில் கடத்திச் சென்று கொலை செய்து புதைத்து, அதன் மீது வாழைமரத்தை நட்டதாகக் குற்றம் சாட்டப்பட்டது.

இது தொடர்பாக ஏறாவூர் பொலிஸார் 9 பேரைக் கைது செய்து, மட்டக்களப்பு நீதவான் நீதிமன்றில் வழக்குத் தாக்கல் செய்தனர்.

நீதவான் நீதிமன்ற விசாரணையின் பின்னர், இந்த வழக்கு 2016ஆம் ஆண்டு மட்டக்களப்பு மேல் நீதிமன்றத்திற்கு மாற்றப்பட்டது. கடத்தலுக்குப் பயன்படுத்தப்பட்ட வேன் மீட்கப்பட்ட நிலையில், வழக்கு விசாரணை தொடர்ந்து நடைபெற்று வந்தது.

வழக்கில் ரவி என அழைக்கப்படும் தர்மலிங்கம் இளமாரன், வீரக்குட்டி சேகர், விஜய் என அழைக்கப்படும் மகேந்திரராஜா வினோராஜ், ஜெக்கா என அழைக்கப்படும் யோகராசா ஜெயக்குமார், சிறி என அழைக்கப்படும் சிறிஸ்கந்தராஜா நாகநாதன், சிவா என அழைக்கப்படும் சொக்கலிங்கம் நாகராசா, அருள் என அழைக்கப்படும் அருணாச்சலம் ராமச்சந்திரன் மற்றும் விஜி என அழைக்கப்படும் கோவிந்தன் பிரதீபன் ஆகிய 8 பேர் குற்றவாளிகளாக இனங்காணப்பட்டுள்ளனர்.

தீர்ப்பு வழங்கப்பட்டபோது, வழக்குத் தொடுநர் சார்பில் அரச சட்டவாதிகளான எஸ். அனுஷாங்கன் மற்றும் ரி. தர்சிகா ஆகியோர் முன்னிலையாகியிருந்தனர்.

இதன்படி, முதலாவது குற்றச்சாட்டான மரணத்தை விளைவிக்கும் பொது நோக்கத்துடன் கூடிய சட்டவிரோதக் கூட்டத்தில் உறுப்பினராக இருந்தமைக்காக தண்டனைச் சட்டக்கோவை பிரிவு 140இன் கீழ் 6 மாத சாதாரண சிறைத்தண்டனை விதிக்கப்பட்டுள்ளது.

இரண்டாவது குற்றச்சாட்டான பொது நோக்கத்தை நிறைவேற்றும் வகையில் சட்டவிரோதக் கூட்டத்தில் உறுப்பினராக இருந்து ஆட்கொலை செய்தமைக்காக தண்டனைச் சட்டக்கோவை பிரிவு 296-இன் கீழ் மரண தண்டனையும், மூன்றாவது குற்றச்சாட்டான தேவதாஸ் சுரேஷ்குமாரின் மரணத்தை விளைவித்து ஆட்கொலை செய்தமைக்காகவும் மரண தண்டனை விதிக்கப்பட்டுள்ளது.

9ஆவது பிரதிவாதியை வழக்கில் இருந்து விடுவித்து நீதிபதி தீர்ப்பளித்ததைத் தொடர்ந்து, மரண தண்டனை விதிக்கப்பட்ட 8 பேரும் உடனடியாக நீதிமன்றத்திலிருந்து மட்டக்களப்பு சிறைச்சாலைக்கு அழைத்துச் செல்லப்பட்டனர்.

ShortNews

“வாழ்க்கைச் செலவு அதிகரிப்புக்கு ஏற்ப இதுவரை நாம் சம்பள உயர்வை வழங்கவில்லை" - அமைச்சர் லால் காந்த ஒப்புதல்!


வாழ்க்கைச் செலவுக்கு ஏற்ப இதுவரை சம்பள உயர்வு வழங்கப்படவில்லை – லால் காந்த ஒப்புதல்

வாழ்க்கைச் செலவு அதிகரிப்புக்கு ஏற்ப அரசாங்கம் இதுவரை சம்பள உயர்வை வழங்கவில்லை என்றும், 2027ஆம் ஆண்டுக்கான வரவு செலவுத் திட்டத்திலும் அவ்வாறான சம்பளத் திருத்தம் எதுவும் உள்ளடக்கப்படவில்லை என்றும் அமைச்சர் கே.டி. லால் காந்த தெரிவித்துள்ளார்.


இன்று (19) நாடாளுமன்றத்தில் உரையாற்றிய அமைச்சர் லால் காந்த, அடுத்த தேசிய வரவு செலவுத் திட்டத்தைத் தயாரிக்கும் போது இந்த விடயம் தொடர்பில் அரசாங்கம் கவனம் செலுத்த வேண்டியிருக்கும் எனக் குறிப்பிட்டார்.


“வாழ்க்கைச் செலவு அதிகரிப்புக்கு ஏற்ப இதுவரை நாம் சம்பள உயர்வை வழங்கவில்லை. இந்த வரவு செலவுத் திட்டத்திலும் அவ்வாறான சம்பள உயர்வு எதுவும் முன்மொழியப்படவில்லை. அடுத்த வரவு செலவுத் திட்டத்தில் இது குறித்து நாம் கவனம் செலுத்த வேண்டும்” என அவர் தெரிவித்தார்.


தொழிலாளர்கள் எதிர்நோக்கும் அனைத்து பிரச்சினைகளுக்கும் தேசிய வரவு செலவுத் திட்டத்தின் ஊடாகத் தீர்வுகளை வழங்க முடியாது எனச் சுட்டிக்காட்டிய அமைச்சர், சில பிரச்சினைகளுக்கு அமைச்சு மட்டத்திலான பேச்சுவார்த்தைகள் அல்லது சம்பள நிர்ணய சபை போன்ற பொறிமுறைகள் ஊடாகத் தீர்வு காண முடியும் என்றும் குறிப்பிட்டார்.


தீர்க்கப்படாத பிரச்சினைகள் தொடர்பில் தொழிற்சங்கங்கள் பேச்சுவார்த்தைகளில் ஈடுபடுவதற்கும் போராட்டங்களை முன்னெடுப்பதற்கும் அவற்றுக்கு உரிமை இருப்பதாகவும் அவர் வலியுறுத்தினார்.


“போராட்டங்களை நடத்துவதில் எந்தத் தவறும் இல்லை. அது அவர்களுடைய உரிமை. அந்த உரிமையை அவர்கள் பயன்படுத்த வேண்டும்” என அமைச்சர் லால் காந்த தெரிவித்தார்.


மேலும், தமது உறுப்பினர்களைப் பாதிக்கும் பிரச்சினைகள் தொடர்பில் நடவடிக்கை எடுக்க வேண்டிய பொறுப்பு தொழிற்சங்கங்களுக்கு இருப்பதாகவும், தொழிலாளர்களின் குறைபாடுகளுக்குத் தீர்வு காணாமல் தொழிற்சங்கங்களால் தமது செயற்பாடுகளைத் திறம்பட முன்னெடுக்க முடியாது என்றும் அவர் குறிப்பிட்டார்.


தனது கடந்தகால தொழிற்சங்கச் செயற்பாடுகள் குறித்த அனுபவத்தையும் நினைவுகூர்ந்த அமைச்சர், இத்தகைய நடவடிக்கைகளின் முக்கியத்துவத்தைத் தாம் நன்கு புரிந்துகொண்டுள்ளதாகத் தெரிவித்தார்.


“கடந்த காலங்களில் நாமும் இத்தகைய செயற்பாடுகளில் ஈடுபட்டவர்கள். இதனை நாம் புரிந்துகொண்டுள்ளோம். அரச சேவையில் உள்ளவர்களும் இதனைப் புரிந்துகொண்டுள்ளனர்” என்றும் அவர் மேலும் தெரிவித்தார்.

Zameera

2008ஆம் ஆண்டு கடத்திக் கொலை செய்யப்பட்ட சம்பவம்: EPDP உறுப்பினர்கள் 8 பேருக்கு மரண தண்டனை!

 

யுத்த காலத்தில், 2008ஆம் ஆண்டு மட்டக்களப்பு – செங்கலடி பகுதியில் ஒருவரைக் கடத்திச் சென்று கொலை செய்த சம்பவம் தொடர்பில் குற்றவாளிகளாகக் காணப்பட்ட EPDP அமைப்பைச் சேர்ந்த எட்டு உறுப்பினர்களுக்கு மட்டக்களப்பு மேல் நீதிமன்றம் மரண தண்டனை விதித்துள்ளது.




நீண்டகாலமாக விசாரணைக்கு உட்படுத்தப்பட்டு வந்த இந்தக் கொலை வழக்கில், குற்றச்சாட்டுகள் நிரூபிக்கப்பட்டதைத் தொடர்ந்து நீதிமன்றம் இந்தத் தீர்ப்பை வழங்கியுள்ளதாகத் தெரிவிக்கப்படுகிறது.




2008 ஜூன் 19ஆம் திகதி செங்கலடிப் பொலிஸ் பிரிவுக்குட்பட்ட பகுதியில் வர்த்தகரான தேவதாசன் சுரேஷ்குமார் என்பவர் வெள்ளை வானில் வந்த குழுவினரால் கடத்தப்பட்டதாக அக்காலத்தில் செய்திகள் வெளியாகியிருந்தன.




பின்னர் ஜூலை 17ஆம் திகதி மட்டக்களப்பில் EPDP அலுவலக வளாகத்தின் பின்புறத்தில் அவரது சடலம் மீட்கப்பட்டதாக அக்கால ஊடகச் செய்திகள் தெரிவித்திருந்தன. இந்தச் சம்பவம் அப்பகுதியில் பெரும் பரபரப்பையும் பதற்றத்தையும் ஏற்படுத்தியிருந்தது.


ShortNews

இம்ரான்கான் அவர்களுக்கு ஆதரவாக எதிர்க்கட்சி பாராளுமன்றத்தில் சபை ஒத்திவைப்பு பிரேரணையை முன்வைத்துள்ளது!


தடுப்புக் காவலில் வைக்கப்பட்டுள்ள பாகிஸ்தான் இஸ்லாமியக் குடியரசின் முன்னாள் பிரதமர் கௌரவ இம்ரான்கான் அவர்களுக்கு மனிதாபிமான கவலைகளை முன்னிறுத்தியும், இலங்கை அவருக்கு ஆதரவை நல்கும் பொருட்டும் எதிர்க்கட்சித் தலைவர் சஜித் பிரேமதாச அவர்களின் ஆலோசனையின் பிரகாரம் ஐக்கிய மக்கள் சக்தி தலைமையிலான எதிர்க்கட்சி இந்த வாரம் பாராளுமன்றத்தில் சபை ஒத்திவைப்பு பிரேரணையை முன்வைத்துள்ளது.

ஜனாதிபதி முன்வைத்த வரவு செலவுத்திட்டத்தின் இரண்டாம் வாசிப்பு மீதான வாக்கெடுப்பு நாளை வெள்ளிக்கிழமை இடம்பெறவுள்ளதால், சனிக்கிழமை (21) இப்பிரேரணை விவாதத்திற்கு எடுத்துக் கொள்ளப்படவுள்ளது.

தடுப்புக் காவலில் உள்ள இம்ரான் கானின் உடல்நலம் மற்றும் நல்வாழ்வு குறித்த கவலைகளை மேற்கோள் காட்டி பிரதான எதிர்க்கட்சி இந்த சபை ஒத்திவைப்பு பிரேரணையை முன்வைத்துள்ளது.

இம்ரான் கானுக்கு போதுமான மற்றும் சுயாதீனமான மருத்துவ சிகிச்சை கிடைப்பதை உறுதி செய்வதற்கு பாகிஸ்தான் அரசாங்கத்தை வலியுறுத்தியும்,

அவரது விடுதலை, உரிய நடைமுறை மற்றும் சர்வதேச அளவில் அங்கீகரிக்கப்பட்ட மனித உரிமைகள் தரநிலைகளுக்கு ஏற்ப பிற பொருத்தமான நிவாரணங்களுக்கான மனிதாபிமான நடவடிக்கைகளை மேற்கொள்வதையும் உறுதி செய்வதும் இதில் வலியுறுத்தப்பட்டுள்ளன.

சர்வதேச கிரிகெட் நட்சத்திரமும், தஹ்ரீக்-இ-இன்சாப் (PTI) கட்சியின் ஸ்தாபகருமான இம்ரான் கானுக்கு ஆதரவாகப் பாகிஸ்தானிலும், சர்வதேச அளவிலும் பல்வேறு அரசியல், மனிதாபிமான மற்றும் விளையாட்டுத் துறை சார்ந்த ஆதரவுக் குரல்கள் தொடர்ந்து எழுப்பப்பட்டு வரும் பின்னனியிலேயே இலங்கை பாராளுமன்றத்திலும் பிரதான எதிர்க்கட்சி இந்த பிரேரணையைக் கொண்டு வருகின்றமை குறிப்பிடத்தக்கதாகும்.

ShortNews

மோட்டார் போக்குவரத்துத் திணைக்களம் விடுத்திருக்கும் விசேட அறிவிப்பு!


மோட்டார் போக்குவரத்துத் திணைக்களத்தின் நாரஹேன்பிட்ட தலைமை அலுவலகத்தின் அனைத்துச் சேவைகளையும் முன்கூட்டியே நேரத்தை ஒதுக்கிக்கொள்ளும் (Appointment) முறையின் கீழ் மாத்திரம் நடைமுறைப்படுத்தப்படும் என மோட்டார் போக்குவரத்து ஆணையாளர் நாயகம் ஓய்வுபெற்ற எயார் வைஸ் மார்ஷல் துஷார பெர்னாண்டோ அறிவித்துள்ளார். அது தொடர்பில் திணைக்களம் வெளியிட்டுள்ள அறிக்கையில் தெரிவிக்கப்பட்டுள்ளதாவது .....




23 ஆம் திகதி முதல் மோட்டார் போக்குவரத்துத் திணைக்களத்தின் நாரஹேன்பிட்ட தலைமை அலுவலகத்தினால் வழங்கப்படும் அனைத்துப் பொதுமக்கள் சேவைகளையும் முன்கூட்டியே நேரத்தை ஒதுக்கிக்கொள்ளும் முறையின் கீழே பெற்றுக் கொள்ளலாம்.




பொதுமக்களின் வசதி கருதி 2026.11.23 ஆம் திகதிக்கு முன்னர் வழங்கப்பட்டிருந்த தினசரி முன்பதிவு வாய்ப்புகளின் எண்ணிக்கையைத் தற்போது இரண்டு மடங்கிற்கும் அதிகமாக உயர்த்துவதற்குத் திணைக்களம் நடவடிக்கை எடுத்துள்ளது.




அதற்கமைய முன்னரை விட அதிகளவான சேவை பெறுநர்களுக்குத் தினசரி விரைவாகவும் இலகுவாகவும் தமது சேவைகளை நிறைவேற்றிக்கொள்ள வாய்ப்புக் கிடைக்கும்.  




சேவை பெறுநர்கள் கீழே குறிப்பிடப்பட்டுள்ள இரண்டு முறைகளில் ஏதேனும் ஒரு முறையின் ஊடாகத் தமக்கு வசதியான நேரத்தை முன்கூட்டியே ஒதுக்கிக்கொள்ள முடியும்:  




தொலைபேசி ஊடாக: 011 2 117 116 என்ற இலக்கத்திற்கு அழைப்பதன் மூலம்.மேலும் இணையத்தளம் ஊடாக: https://dmtappointments.dmt.gov.lk எனும் இணையத்தளத்திற்குப் பிரவேசிப்பதன் மூலம் நேரத்தை ஒதுக்கிக் கொள்ளலாம். 




ஆகையால், 23 ஆம் திகதி முதல் நாரஹேன்பிட்ட தலைமை அலுவலக வளாகத்திற்கு அருகில் அதிகாலை முதலே தேவையற்ற விதத்தில் வரிசைகளில் காத்திருப்பதைத் தவிர்க்குமாறும்,




சேவை பெறுநர்களின் வசதி மற்றும் நேரத்தைச் சேமிக்கும் நோக்கில் அறிமுகப்படுத்தப்பட்டுள்ள இந்த முன்கூட்டியே நேரத்தை ஒதுக்கிக்கொள்ளும் முறையை மாத்திரம் பின்பற்றிச் சேவைகளைப் பெற்றுக்கொள்ள நடவடிக்கை எடுக்குமாறும் தயவுடன் கேட்டுக் கொள்கின்றேன் என ஆணையாளர் வெளியிட்டுள்ள அறிவிப்பில் குறிப்பிடப்பட்டிருந்தது. 

ShortNews

79ஆவது தேசிய சுதந்திர தினக் கொண்டாட்ட விழா சுதந்திர சதுக்கத்தில்!


79ஆவது தேசிய சுதந்திர தினக் கொண்டாட்ட விழா தொடர்பான முதற்கட்டக் கலந்துரையாடல், பிரதமர் கலாநிதி ஹரிணி அமரசூரிய தலைமையில் நேற்று (18) அலரி மாளிகையில் நடைபெற்றது.

இதன்போது, தேசிய சுதந்திர தினக் கொண்டாட்டத்தைச் சுதந்திர சதுக்கத்தில் நடத்துவதற்குத் தீர்மானிக்கப்பட்டதுடன், இம்முறை சுதந்திர தின விழாவின் தொனிப்பொருள், ஒழுங்கமைப்பு நடவடிக்கைகள், நிகழ்ச்சி நிரல், சமய நிகழ்வுகள் உள்ளிட்ட ஏனைய விடயங்கள் தொடர்பிலும் கவனம் செலுத்தப்பட்டது.

அமைச்சர்களான ஹினிதும சுனில் செனெவி, வசந்த சமரசிங்க, சந்தன அபேரத்ன, சமந்த வித்யாரத்ன மற்றும் பிரதி அமைச்சர் பிரசன்ன குணசேன ஆகியோரும், நிதி அமைச்சு, பாதுகாப்பு அமைச்சு, கல்வி அமைச்சு, வலுசக்தி அமைச்சு, மேல் மாகாண சபை உள்ளிட்ட அரச நிறுவனங்களின் அதிகாரிகளும் இந்நிகழ்வில் கலந்துகொண்டனர்.